Yewin Pêvînayîşê Ciwanan ê Spor û Kulturî yê Peyasî ke hîrê rojî dewam kerd ewro qedîya.
Yewin Pêvînayîşê Ciwanan ê Spor û Kulturî yê Peyasî ke hetê Şaredarîya Peyasî û Komeleya Seba Ameyoxî Ma Tîya de yê ra amebî organîzekerdene û hîrê rojî dewam kerd, ewro qedîya.
Programê ke mabênê 12-14ê hezîranî de ciwanî seba kultur, huner û xozayî ameyî pêser, badê di rojanê peyênan, ewro bi oxirkerdişê meymanan qedîya.
Yewin Pêvînayîşê Ciwanan ê Spor û Kulturî yê Peyasî roja 12ê hezîranî de Meydanê Parka 75î de bi konserekê dest pê kerdbi û bi deyîranê dengbêjî Hediye û Berken Zerî ra hîna zêde reng da nê pêvînayîşî; sewbîna Simyager, Eylul Nazlier û Kasim Taşdogan zî vejîyayî sehneyî ser û bi deyîranê xo coşê meydanê berz kerd.
Roja dîyina de ciwanî badê sporê sibayî û arayî ameyî pêser û mîyanê rojî de panelanê ekolojî, jineolojî û kursîyê azadî de nîqaşê muhîmî kerdî. Şan de zî xebatê sporî, kayê şarî yê Kurdkî û goşdarîkerdişê muzîkî roja dîyina temam bî.
Roja hîrêyin û peyêne zî, yanî ewro, ciwanan bi temamî wextê xo seba tarîx û xoza vîyarna. Ciwanê ke sereyê sibayî de zaf rew ameyî pêser, tewrê gêrayîşê kulturî ya qezaya Sûrî ya tarîxî û Baxçeyanê Hewselî ke Lîsteya Mîrasî Cîhanî ya UNESCOyî de yê, bîyî.
Badê rayraşîyayîşî ciwanan Merkezê Kulturî yê Amargî de pîya arayî kerde. Kombîyayîşo ke hîrê rojî vîrê kulturî, hişmendîya ekolojîk û dînamîzmê ciwanan vet vernî, bi oxirkerdişê ciwananê ke qezayan û teberê şaristanî ra ameybî, qedîya.
