AMED – Welatijê bi nameyê Bişar Îçlî, Şermîn Guven û Semîha Yildiz bi destekê Weqfê Sporî yê Înîtîatîve, broşurêko bi nameyê ‘Çem Jiyanê Nexş Dikin’ amade kerd û amancê vetişê broşurî fehmkerdiş û naskerdişê pawitişî, muhîmî û vîrê awe yo.
Welatijê bi nameyê Bişar Îçlî, Şermîn Guven û Semîha Yildiz bi destekê Weqfê Sporî yê Înîtîatîve broşurêk bi nameyê ‘Çem Jîyanê Nexş Dikin’ amade kerd. Na xebate ke çarçewaya vîzyonê pawitişê vîrê ekolojîk û zanayîşê herêmî ya Weqfê Sporî yê Înnîtîatîve ya ke merkezê ey şaristanê Berlînî yê Almanya de yo ameyo amadekerdene ke krîzê awe, vîrê herêmî û têkilîyanê merdim û xoza ya vakurê Kurdîstanî bi nêzdîbîyayîşêko zafhetî gêno mîyanê xo. Broşur bi şîîre û nuşteyanê lehçeya kurmanckî û sorankî yê Kurdkî ameyo hedrekerdene. Xêzê ke broşur de ca gênê rolê cinîyan û komelê yê mîyanê xoza de gênê vernîya çiman û ravurneno belgeyêko şênber ê vîrê komelî. Na xebata kolektîfe bale ancena serê rastîya unîversale. Bi xerîteya awe ya ke çemane Dîcle, Firat, û Xabûrî gêno mîyanê xo broşur de bale anceno xo ser. Broşur de ke ameyo amadekerdene yeno amanckerdene ke pawitişê awe, muhîmîya awe û vîrê awe bêro fehmkerdiş û naskerdiş.
Amadekaranê broşurî ra Semîha Yildiz derheqê xebatanê xo û broşurî de ke ameyo hedrekerdene ajansê ma rê qisey kerd.
‘Ma wazenê têkilîya cinî, xoza û keda înan bîyarê vernîya çiman’
Semîha Yildiz dîyar kerd ke no broşur hetkarîya înan keno ke ey şuxulnayîşê awe, ciwîyayîş, têkoşînê domnayîşê cuye û tewrbîyayîşê mîyanê merdiman de fehm bikerê û wina vat: “Ma heta nika xeylê atolyeyî viraştî. Ma waştêne atolyeyê ma hîna zêde bêrê fehmkerdiş, naye ra ma nê broşurî hedre kerdî. heta nika mîsalêkî weş ê, ma hem Amed de, hem zî Wan de atolyeya dengbêjîye viraşte. Seba ke awe kewena mîyanê hîkayeya ma, kewena mîyanê kulturê ma û heme hetî ra tesîrê cuya ma kena. Seba ke uca de di herêmê cîyayî, tesîrê înan û tesîrê awe serê yewbînan de cîya beno. Senî ke ma no kargeh bi ca ard, ma vîna ke Amed de awe kêmî ya. Wexto ke Amed û Mardîn de, awe kêmî bena û hende waştişê awe zêde beno; la cayêko awe zêde ya, ge ge na awa zêde zî seba înan felaketan ana. Coka nê çîyî tesîrê deyîranê înan de zî keno. Ma eşkenê tena naye ra analîzê serê cuya nê kesan bikerê; senî tesîrê deyîr û kulturê înan ser o kerdo. Tena çimeyanê awe nîyê, eynî wextî de çimeyê kulturî yê zî. Yew atolyeya ma zî serê arêdayîşê tuzikî de bî . Tuzîk herêma ma de zaf zêdeyo û xeylê zî naskerde yo. Ma atolyeyêke wina viraşte ke ma waşt vîro kolektîf reyna gandar bikerê û têkilîya mabênê merdim û xoza de newe bikerê. Hem zî no kar sey karê cinîyan yeno vînayene. Wexto ke cinî karê ke kenê, biney komel qîymet nêdano ci. Ma wazenê têkilîyê cinî, xoza û keda înan bîyarê verê çiman.”
‘Broşur de xerîteya çemanê Kurdîstanî zî est ê’
Semîha Yildiz ard ziwan ke sewbîna ê wazenê derheqê vîrê awa komelî de arêdayîş bikerê û qiseykerdişê xo wina qedêna: “Ma wazenê vîrê awa komelî bîyarê pêser ke bieşkê dima ra tira îstîfade bikerê. wexto ke ma verê xo dano broşur deyîrêka hem sorankî hem zî kurmanckî est a, deyîra Dîlber Hêma, ‘Min Ava Spî me, ez Ava Spî me’ ca gêna. Destpêkê broşurî zî bi na deyîre dest pêkerd. Nê tecrubeyan Munzur ra, Dîcle ra, Firat ra; Nê vaşê verê ey çemanê ma vînenê, bi rastî ma qiseykerdişê înan û vengê înan eşnawenê. La tena ê zanyarîyê xorînî nîyê; seke mi va ma sey hîkayeyêke eşnawenê. Gama ke ma şinê Wan, ma vengê Şahmeran eşnawenê; gama ma şinê Munzur sloganê şarê ucayî de est ê: ‘Wa Munzur azad biherikîyo.’ Ma rastê çîyanê winayînan yenê. Sewbîna broşur de xerîteyêke est o, xerîteyê çemanê Kurdîstanî. Tîya Dîcle, Firat û Xabûrê ma vînenê û Dîcle, Firat û xabûr senî serê awanê bînan ê qijan ser o tesîr kenê. Ê awa girdê la sewbîna awê qijî zî zaf kewenê serê awanê bînan, tîya de tesîrê nê çîyan zî vînenê. Broşur de xêzî estê, wexto ke ma şinê atolyeyan taybetî ma nê xêzan nîşanê înan danê û ma vanê şima eşkenê hîkayeya nê çîyî ma rê vajê. Bi rastî zî her game çîyêk newe ser o zêde beno û çîyêko cîya vanê, ewnîyayîşê her kesî cîya benê. Ma xêzan de tesîrê awe ya serê komelî û têkilîya cinîyan ê serê xoza û awe mojneno.”
