Hemsereka TEV-DEM’î Remzîya Mihemed Konferansê Cinîyanê Kurdan ke demê peyên de ameyê kerdene erjnayî û bale ant yewîya cinîyan ser o û dîyar kerd ke xebatê înan yê semedê Konferansê Cinîyanê Kurdan ê Neteweyî dewam kenê.
Serkêşîya cinîyanê kurdan ê Rojawanî de tewr peyên Konferansê Cinîyanê Kurdan yê 1. bi sloganî “Yewîya Neteweyî ya Kurdî bi serkêşîya Cinîyanê Kurdan pê yena” ame organîzekerdiş. Konferanso de ke 300 delege tewrê ci bîyê, cinîyan bale ant muhîmîya yewîya neteweyî ser o û peynîya konferansî de netîcenameyê konferansî yê ke 11 maddeyan ra pê yeno, ame weşanayîş.
Hemsereka Têgêrayîşê Komelê Demokratîkî (TEV-DEM) Remzîya Mihemedî derheqê konferansî û netîcenameya konferansî ajansê JINNEWS’î rê erjna.
Muhîmîya yewîya cinîyan
Remzîya Mihemed bale ant muhîmîya organîzekerdişê Konferansê Cinîyanê Kurdan yê 1. ser o û va: “Cinî hem hemverê rejîmî hem zî hemverê feodalîzmî de têkoşîn kenê. Eynî wextî de cinî bi rol û berpirsyarîyêka pîle beşdarê prosesê şorişî bîyê. Her problemê komelî de cinî bi tesîr benê. Nê semedî ra her kongre û konferansêk ke hetê cinîyan ra yeno organîzekerdiş, wayîrê muhîmîyêka pîl o. Bi yewîya cinîyan do cinî xebatanê xo hîna hîra bikerê.”
‘Cinîyan mohrê xo da tarîxî ro’
Remzîya Mihemed dewamê qiseykerdişê xo de wina va: “Ma sey Îdareyê Xoserî têkoşîn kenê ke bi hawayêko demokratîk xo îdare bikerê. Ma çîyêko baş nêdî ke hukmatê demkî yê Şamî heta nika semedê şaran kerdo. Ma qirkerdişê ke newe ra ameyê kerdiş vînenê. Destûrê bingeyîn ê neweyî de semedê cinîyan qet çîyêk çin o. Nê semedî ra wezîfeyêko pîl keweno milê cinîyan ser o. Bi Îdarekarîya Xoserî ame vînayîş ke cinî eşkenê heme wareyê cuye de ca bigîrê. Semedê hêzê pawitişê cinî sîstemêk ameyo awankerdiş û no sîstem eşkeno pêro dinya rê bibo nimûne.”
Felsefeya ‘Jin jiyan azadî’
Remzîya Mihemed felsefeya; Jin jiyan azadî ard vîr û va: “Hemverê îdareyê Xoserî xeylêk hêrişê rejîmê Baasî pê ameyî. Xoresnayîşê cinîyan de zî problemê ma est bî. La rewşa yewgirewtişî û birêxistinkerdişî yê cinîyan têkoşînê cinîyan hîna zaf xurt kerd. Sey cinîyê Vakûr û Rojhelatê Sûrîye ma têkoşînê cinî kenê û ma amade yê ke tecrûbeyê xo û felsefeya ‘Jin jiyan azadî’ pêro cinîyanê Sûriye reyde pare bikerê. Semedo ke ewro sloganê, ‘Jin jiyan azadî’ warê azadîya cinî de dinya rê nimûne yo. Eke cinî goreyê na felsefe xo bi rêxistin bikera, do rayîrê xeylê averşîyayîşan akero.”
‘Cinî serkêşîya şorişî kenê’
Remzîya Mihemed tewr peyên wina va: “Qeraranê ma yê konferansî ra yew zî organîzekerdişê Konferansê Cinîyanê Kurdan ê Neteweyî yê demo ameyoxî de yo. Na xebata ke ma do bikerê, şorişê cinî de wayîrê cayêko muhîm o. Têkoşînê cinîyan pozîsyonê serkêşîya şorişî de vindeno. Xebatê cinîyan her tim bingeyê xebatanê komelkîyan ra yew o.”
