Serekê Beranê Sînorî yê Sûrîye Kuteybe Bedewî dîyar kerd ke seba akerdişê berê sînor ê Nisêbîn û Qamişlo xebate dest pêkerda.
Serekê Beranê Sînorî yê Sûrîye Kuteybe Bedewî hesabê xo yê medyaya dîjîtal ser o, derheqê akerdişê berê sînorî yê Nisêbîn û Qamişlo de vilakerdişêk kerd. Kuteybe Bedewî dîyar kerd ke înan seba akerdişê berê sînorî dest bi xebatanê binawanîye kerdo. Kuteybe Bedewî dîyar kerd ke înan na xebate seba şîyayîş-amayîşêko biserûber dest pêkerda û bi akerdişê berê sînorî do hûmara beranê sînorî yê mabenê Sûrîye û Tirkîya vejîyo 7.
Verê nika zî rayedaranê Sûrîye eşkera kerdbî ke do berê sînorî yê mabenê Nisêbîn û Qamişlo de, heta peynîya 2026î de bêro akerdene.
