Wezareta Kultur û Tûrîzmî persnameya parlamentera DEM Partî ya Şirnexî Newroze Uysal Aslane yê derheqê Medreseya Feqîyê Teyranî de bi hawayêko sosret cewab da. Wezaretî îdîa kerd ke mulkîyetê Medreseya Feqîyê Teyranî aîdê Wezaretê Xezîne û Malîye yo û wezaretî înan rê nêameyo tehsîskerdene.
Parlamentere Newroze Uysal Aslane 17ê adara 2026î de derheqê Medreseya Feqîyê Teyranî ya dewa Fînîkê ya qezaya Basayî de Wezîrê Çand û Tûrîzmî Mehmet Nurî Ersoyî rê persnameyêke dabî. Medrese her çiqas bîna pawitişê dewlete de ya û statuya “Ewmaya Kulturîye” de ca gêna zî, nêameye pawitene û rî bi rîyê rirnayîşî menda.
Aslane persnameya xo de dîqet antbî muhîmîya kesayetîya Feqîyê Teyranî ya mîyanê tarîx û edebîyatê kurdkî ser û pers kerd ke çira seba newekerdişê xebatêke nêameya kerdene.
Wezaretê Kultur û Tûrîzmî cewabê xo de ard ziwan ke medrese dereceya yewîne ya warê SÎT’î yê arkeolojîkî de ca gêna û mulkîyetê aye yê Wezaretê Xezîne û Malîye yo. Wezaretî dîyar kerd ke 21ê nîsana 2021î de qerarê amadekerdişa projeyê restorasyonî ameyo dayene, la heta nika tu proje teslîmê mudurîyetî nêbîyo. Heto bîn ra, serê berê Medreseya Feqîyê Teyranî de lewhaya wezaretî bîyayîşî rê zî înan wayîrvejîyayîşî qebul nêkerd.
Her çiqas tarîxê aye yo tam nêro zanayene zî, goreyê cigêrayîşan medrese mîyanê serranê 1501 û 1600î de ameya viraştene. Dima ke Feqîyê Teyranî uca wend, nameyê ey dîyayo cayî. Ban û dîwarê medreseya tarîxî rijnayene yê, mîyanê aye de darî bîyê pîlî û derzê girdî kewtê bîne. Serranê 90an de dewrê xebatanê rayîre de zerar dîyabi aye û heta nika restorasyon nêameyo kerdene.
Parlamenterê AKP’yî yo Şirnexî Aslan Tatarî serra vîyarte de vatbî ke xebata restorasyonî do bêro destpêkerdene, la reyna zî tu game nêameye eştene. Medrese eger mudaxele nêbo mîyanê wextêko kilm de bi temamî wêran bena.











