Amed – Parlamenterê DEM Partî Omer Faruk Hulaku badê zîyaretê Hepisxaneyê Ereglî qisey kerd û dîyar kerd ke dozgero newe bi helwestêko xirab vera Prosesê Aştî heqanê qezenckerdeyan ê hepsîyan peyser gêno.
Hepisxaneyê Emnîyetê Berzî yê Ereglî de problemî dewam kenê. 2 aşmî verê cû dozger ame vurnayîş. Dozgero newe roja ke ameyo ra nat zext û bêhuqûqîya ser hepsîyanê sîyasîyan kêm nêkeno. Ajansa Welatî 4ê teşrîna peyêne de derheqê nê problemanê de xeberêk viraşte. Badê xebera ma, Parlamenterê DEM Partî yê Çewlîgî Omer Faruk Hulaku û yê Şirnexî Zekî Îrmezî 12ê teşrîna peyêne de Hepisxaneyê Ereglî de hepsîyê sîyasî zîyaret kerdî.
Parlamenter Omer Faruk Hulaku badê zîyaretî Ajansê Welatî rê qisey kerd.
Omer Faruk Hulaku dîyar kerd ke badê ke îdareyo newe ame hepisxane, zextî hepsîyanê sîyasîyan ser o zêde bîyê. Omer Faruk Hulaku bale ante qerarê Heyetê Îdare û Çimdarîye ser û vat: “Astengkerdişê azadkerdişê hepsîyan, dergkerdişê dewrê înfazî û mîyanê bêbawerîye de tepiştişê hepsîyan binpaykerdişêko giran ê heqan o. Rixmê ke hepsîyo sîyasî Sînan Çelîkî cezaya xo qedênaya zî nêyeno azadkerdiş. No heyet heqan nêpaweno, bîyo hacetê cezakerdişî.”
‘Hepsîyan vila kenê, tecrîdêko giran est o’
Omer Faruk Hulaku diyar kerd ke Hepisxaneyê Ereglî de 12 hepsîyê sîyasî est ê ke cezayê giranî girewtê û înan kerdê mîyanê qawuşanê edlîyan û vat: “Waştişê înan o ke pîya bimanê, la bica nêyeno. Rojname û radyo ameyê qedexekerdiş. Nê çîyî tecrîdî xorînêr kenê. Hepsîyî wexto ke şonê nêweşxane, 2 kelepçeyan kenê destanê înan. Hepsîyê sîyasî sebebê nê helwestê bêşerefî ra mecbur manenê ke nêşêrê nêweşxane. Heqê weşîye yeno xesbkerdiş.”
‘Dozgero ke uca yo, vera prosesî helwestêko xirab mojneno’
Omer Faruk Hulaku bale ante Prosesê Aştî ser û vat: “Tirkîya de qalê Prosesê Aştî û Komelê Demokratîkî yeno kerdiş; ganî problemê hepisxaneyan zî sey babeteyêka muhîme bêrê destgirewtiş. Hetanî ke edalet û heqê bingeyênî mîyanê hepisxaneyan de nêbêrê garantîkerdiş, komelo demokratîk awan nêbeno. Dozgero ke uca yo, vera prosesî helwestêko xirab mojneno û heqanê ke ameyê qezenckerdiş peyser gêno. Bi tecrîd û cezayanê dîsîplînî nêeşkenê îradeya hepsîyan bişiknê. Ganî helwestê nê dozgerî bêro teftîşkerdiş û waştişê hepsîyan bêrê qebulkerdiş.”
‘Ma do meclîs de bikerê rojev’
Omer Faruk Hulaku peynîya qiseykerdişê xo de dîyar kerd ke mektube, fotograf û wendişê kitaban zî ameyê astengkerdiş û qiseyê xo wina qedêna: “Ma do peyê heme îdiayan de vinderê. Têgêrayîşê ma yê Wezaretê Edaletî û îdare de do dewam bikerê. Ma do Meclîs de bi pêşnîyazanê persan û muracatanê Komîsyonê Cigêrayîşê Heqanê Merdiman nê neheqîyan biyarê roştî. Heqê edaletî, cuye, weşîye û şerefê hepsîyan emanetê heme komelî yo.











