Sîyasetmedaran seba mîtîngê “Seba aştîye azadî” ke do 8ê Sibate, Amed de bêro viraştiş, vengê beşdarbîyayişî dayê û vatê: “Problemê Kurd tena bi paradîgmaya Birêz Abdullah Ocalan eşkîyeno bêro çareserkerdene.”
8ê Sibate de do bi rayberîya DBP û DEM Partîye bi siloganê “Seba Aştîye azadî” Warê Îstasyonî yê Amedîde mîtîng bêro viraştêne. Hemserekê pêroyî yê DBP û DEM Partîye do beşdarê mîtîngî bibî û derheqê çareserîya problemê Kurd mesajan bidê. Seba beşdarîya mîtîngî, şaristanê sey Amed, Sêrt, Êlih, Şirnex, Mêrdîn, Riha, Semsûr û sewbî xebatê beşdarîya mîtîngî yeno kerdêne.
Hemserekê DBP’î yê Sêrtî Mustafa Dayan ke xebatan de ca gêno, dîyar kerd ke mîtîng de derheqê geşedanê Rojhilatê Mîyanênî û nîqaşê Tirkîya de mesajê avzel bêrê dayêne.
Wa her kes beşdar bibo
Dayan, ard ziwan ke êdî dem demê çareserîya problemê kurd û statûya kurdan o û wina domna: “Seba pêvînayişê estbîyîye derbasî muzakerayan bibê, ma do nêzdîbîyayişê xo no mîtîng de nîşan bidê. No problem tena eşkîyeno bi paradîgmaya Birêz Abdullah Ocalan ra bêro çareserkerdêne. No ser wa heme şar dormeya na paradîgmaye de kom bibê. Wa şarê bîn zî beşdarê mîtîngî bibê û vatişê Birêz Abdullah Ocalan esas bigê. Bi raştî zî azadî nêz a. Wa her kes na çarçiweye de beşdarî mîtîng ra bibê. Wa şar no mîtîngî ra çarçiweya çareserîye de sey gamêk bivînê. Wa şarê ma do warê bidekerî. Ma kewtê pêvajoyêk ke wa wina wayîrvejyayiş bivirazîyo.”
Demokrasî û huquq
Hemsereka DEM Partîye ya Sêrtî Rewşan Arslan zî da zanayiş ke sey şarê Sêrtî ê do beşdarê mîtîngê Amedî bibê û wina domna: “Şarê kurd bi serran ke têkoşîn danê. Şarê kurd azadî, aştî, demokrasî û huquq wazenê. Kurd wazenê tecrîdê ser Birêz Abdullah Ocalan hawanîyo û azad bibo. Mîtîngêko avzel o û no ser her kes rê veng dana ke wa beşdarê mîtîng bibê.”
