26 partîyanê siyasî ê Vakur û Rojhelatê Sûrîye hewldayena vurnayîşê nameyê Kobanî şermezar kerd û eşkerayîyêk da: “Şaristanê Kobanî şaristanêko ke rêxistino tewr gird ê terorî yê dinya bin kerdo û dinya de bîyo sembolê xoverdayîşê şarê kurdî.”
26 partî û sazgehê sîyasî yê ke Vakur û Rojhelatê Sûrîye (Rojava) de aktîf ê, mîyanê înan de Kongreya Neteweyî ya Kurdîstanî (KNK) û Partîya Yewîya Demokratîke (PYD) zî estê, bi eşkerayîyêka hempare vera hewldayena vurnayîşê nameyê Kobanî reaksîyon mojna.
Eşkerayîya hempare ya partî û sazgehanê sîyasî de ame dîyarkerdiş ke şorişê Sûrîye bi beşdarîya heme temsîlkaranê komelê Sûrîye û taybetî şarê kurdî dest pêkerdo. Sewbîna ame vîrardiş ke kurdan seba pawitişê herra xo û bidestvistişê heqanê xo xeylî fedakarîye girdî kerdî.
“Ayn el Arabî rê ney, Kobanî rê eya” bi hezaran Kobanijî seba nasnameyê şaristanê xo rayra şîyî
Eşkerayîye de bale ame antiş ke şarê kurdî badê nê heme fedekarîyanê giranan û rijnayîşê sîstemo despotîk hêvî kenê ke welateko azad, demokratîk û zaf rengî ke bê cîyakerdişê heme şaran xo de bihewno bêrê awankerdene.
Kobanî sembolê xoverdayîşê şarê kurdî yo
Partî û sazgehanê sîyasî derheqê hewldayena vurnayîşê nameyê şaristanî Kobanî de wina vat: “Badê nê heme fedakarîyan û rijnayîşê rejîmê zordar ê Baasî, hêvîya ma na bî ke welat bikewo serdemêko newe. Nê demî de ganî heqê ke wayîrê înan ra ameyê girewtiş, agêrê wayîrê înan û zordestî yo tarîxî şarê kurdî ser o bêro peynîardiş. Waştişan ra yew o bingeyîn zî no yo ke nameyê tarîxî û raştêkî ê herêmanê kurdî reyna bêrê xebitnayîş. Nê nameyê verê ke bi sîyasetê erebkerdişî û vurnayîşê demografîk bêrê bedilnayîş, her tim nasname, kultur û tarîxî şarê herême temsîl kerdêni. Taybetî zî şaristanê Kobanî şaristanêko ke rêxistino tewr gird ê terorî yê dinya bin kerdo û dinya de bîyo sembolê xoverdayîşê şarê kurdî.”
