Badê ke Trabzon de semedê nuşteyê “Şampiyon Amedspor” hêrişê yew otobusa raywanan a Wanî ameya kerdene, Kurdîstan ra paştîdayena girde ame dayene. Fîrmayê otobusan vera nîjadperestî bîyê yew û ekrananê heme otobusanê xo ser o nuşteyê “Şampiyon Amedspor” nuşt.
Hêrişê nîjadperestî yo ke Trabzon de vera yew otobusa raywanan a Wanî ameya kerdene, Vakurê Kurdistanî de bîyî sebebê reaksîyonanê huşkan. Fîrmayan bi armancê mojnayîşê reaksîyonî otobusanê xo ser o nuşteyê, “Şampiyon Amedspor û Ma Yenê” nuşt.
Fîrmayan ra paştîdayena girde
Vera hêrişê Trabzonî, cewabo tewr baş fîrmayanê raywanî yê Kurdistanî ra ame. Fîrmayê otobusan yê ke Vakurê Kurdistanî de xizmet danê, vera na neheqîye û bêtehemulîya nîjadperestî bîyê yew û bi yewvengî cewab da.
Mesajê yewîye û paştîdayene: Amedspor
Zaf fîrmayê ke merkezê înan Amed, Wan, Çewlîg, Mûş, Agirî û Mêrdîn de yê, semedê şermezarkerdene û wayîrvejiyayîşê destkewteyan, ekrananê LED ê otobusanê xo ser o nuşteyê “Şampiyon Amedspor” vet û bi nê tewirî dest bi seferanê xo kerd. Fîrmayan bi nê tewirê xo hem serkewtişê Amedsporî fîraz kerd hem zî vera hêrişê faşîstî yo ke hemkaranê înan ê Wanijan rê ameya kerdene, mesajêko baş ê paştîdayene da.
Trabzon de se bîbî?
Temsîlkara Amedî Amedspor ke bi serkewtişêko gird derbasê Lîga Super bî û amadekarî keno ke sezono neweyî de vera taximanê sey Galatasaray, Fenerbahçe, Beşîktaş, Trabzonspor û Erziromsporî kaybikero, fîrazkerdişê ey yê şampîyonî hetê nîjadperestan ra bîyî hedef.
Hêrişê otobuse kerdbî
verê naye zî wexto ke yew otobusa fîrmayêka Wanî mîyanê şaristanê Trabzonî ra derbas bena, tena semedê ke ekrana aye ya LED ser o “Şampiyon Amedspor” nuştêne, vernîya aye ameye birnayene. Şofêrê otobuse û raywanê ke tede bîyî, hetê grûbanê nîjadperestan ra rastê heqaret û tehdîdan ameyê. No serebûtê rayîr birnayenê û tehdîd, temamê Kurdistanî de bîyî sebebê hers û reaksîyonêko gird.
