Kaykerdoxê tîyatroyî Omer Şahîn seba konserê serrgêra NÇM’î yê 34îne do Amed de bêro viraştene vengdayişê beşdarîye kerd.
Merkezê Kulturê Mezopotamyayî (NÇM) 27ê Êlula 1991î de hetê komêka roşnvîr ke Musa Anter zî mîyan de bî, Cadeya Îstîklalî ya Beyoglû ya Îstanbulî de ame awankerdene. NÇM ke zaf şaxê hunerî yê sey tîyatro, sînema, muzîk, govendê gelerî û dansê hemdemî de xelqkerdene, ziwan û rengê şarî bi xususî kurdkî nîşan da.
NÇM zaf rayan raştî hêrişê polîsan ame, hunermendê ci ameyê destbendkerdene û hepskerdene. Çalakîyê ci ameyê astengkerdiş, salon nêdayê ci û sey hedef nîşan dayê. Serra 2016î de NÇM fina zaf sazîyan bi Biryarnameyê Hukmê Qanûnî (KHK) de ame girewtiş.
NÇM, 1ê Sibate de do seba 34îne serrgêra xo, Amed de Salonê Ayaz Elaganceyî de bi siloganê “Awazên Rojê” konserêk bivirazo. Konsero ke hunermendê NÇM’î, Jin Ma, Koroya Domanan a Komeleya Kultur û Hunerî ya Dîcleyî, Koma Govendî ya KASED’î û hunermendê surprîz mîyan de ca gênê do saet 19.00î de destpê biko.
Wa her kes beşdar bibo
Kaykerdoxê tîyatroyî Omer Şahîn ke serra 2003î de beşdarê NÇM’î bî, welatijan dawetê konserî kerd û destnîşan kerd ke NÇM sey reaksîyonê verba polîtîkayê asîmîlasyonî vejyayo werte û va ke demo ke kurdkî dibistan, kar, warê cuye û sazîyê dewlete de qedexe bî de ameyo awankerdene.
Şahîn destnîşan kerd ke kulturê NÇM’î nê tena Tirkîya û Kurdistanî de heme dinya de cayê xo girewto û vengda ke wa her kes beşdarê konserê NÇM’î bibî.
