Torra Heqanê Merdiman a Kurdîstanî eşkera kerd ke Urmîye de di cinîyê kurdî bê fermanê mehkema hetê hêzanê Îtlaetî ra ameyê destbendkerdene û aqûbetê înan nêyena zaneyene.
Torra Heqanê Merdiman a Kurdîstanî da zanayene ke cinîyêka ciwane ya kurde ya bi nameyê Befrîn Ehmedweş ke şarê dewa Keçele ya girêdayîya şaristanê Urmîye ya, hetê hêzanê Îtlaeta Supayê Pasdaran ra ameya destbendkerdene û berda cayêko nedîyar. Torra Heqanê Merdiman a Kurdîstanî dîyar kerd ke cinîya ciwane wextê sereştişê keyeyê her di apanê aye de bê qerarê dozgerî ameya destbendkerdene û vat ke, tewlê heme hewldananê keyeyî yê seba agahîya aqûbetê aye, sazgehanê rejîmî tu agahî keyeyî reyde pare nêkerda.
Verê hîrê rojan zî xebera dorpêçkerdişê aye dewe ke hetê hêzanê Îtlaeta Supayê Pasdaran ra amebî vilakerdene û amebî vatene ke hîrê kesê bi nameyanê; Eywez Bêhnmun, Şeban Ehmedweş û Îbrahîm Ehmedweş ameyê destbendkerdene.
Hetê bînî ra, tewlê ke destbendkerdişê cinîya kurde ya bi nameyê Perwîn Rasiq Qizilbaş ke şarê şaristanokê Mako ya girêdayê şaristanê Urmîye ya ser o 50 rojî vîyartê, hema zî derheqê aqûbetê aye de nêyena zaneyene.
Perwîn Rasiq Qizilbaş (33) bê destûrê dozgerî hetê hêzanê Îtlaeta Supayê Pasdaran ra amebî destbendkerdene. Tewlê heme hewldananê keyeyî, sazgehê rejîmî derheqê aqûbetê aye de tu agahî keyeyî reyde pare nêkenê.
