Mehkemeyanê Îranî 5 çalakkeran rê cezaya îdamî birnaye. Sewbîna Urmîye û Îlam de bi desan hepsîyê sîyasî û bawermendê dînî vera cezayanê giranan ê hepsî de rî bi rî mendî.
Rêxistina Heqanê Merdiman a Kurdîstanî derheqê tedayanê rejîmê Îranî yê vera welatîyanê Rojhelatê Kurdîstanî û Îranî de raporêk weşana.
Raporî de ame dîyarkerdene ke mehkemeyanê Tehran û Meşhedî 5 çalakkeranê ke serewedartişê çeleyê 2026î de ameyî tepîştene rê cezaya îdamî birnaye.
Nameyê çalakkeranê ke cezaya îdamî înan rê ameye birnayene, nê yê: “Elîreza Rezaî, Vehîd Qehermanî, Mehdî Celalî, Metîn Şebanî û Emîr Dilşad.”
Ame dîyarkerdene ke nê 5 welatîyî bi behaneya “hemkarîya welatanê dişmenan” ameyî cezakerdene. Eynî dewa de di cinîyê hepsî ke nasnameyê înan hetanî nika zelal nêbîyo, her yewe bi 30 serran hepis ameye cezakerdene.
Sewbîna seba Mehdî Celalî ke verê cû melayêkê dînî bî, dewayêka bîne de mehkemeya taybete ya melayan de bi behaneya “dîn ra vejîyayîş” cezaya îdamî ameye birnayene.
Heto bîn ra Hepisxaneyê Merkezî yê Urmîye de tewr kêmî 20 hepsîyê bawermendê dînî est ê ke rêxistine nasnameyê înan eşkera kerd. Nê hepsîyî 6 aşman ra heta 10 serran û yew roje bi hepis ameyî cezakerdene.
Nameyê nê hepsîyan zî nê yê: “Yequb Muradî, Îbrahîm Jiyanî, Areş Agahî, Esed Mihemedîyan, Awîne Qeyteranî, Çiya Nesrulahî, Resûl Yûsif, Siyamend Elîpûr, Hêmin Ehmedî, Emîn Dilnişîn, Şehriyar Xizir, Cefer, Wezîr Zersaw, Rehîm Asare, Efşîn, Areş Qulîzade, Mîhran Nîrumendî, Kamyar Şêxhî, Mewlûd Ateşbar û Seadet Taşke. Nê hepsîyî heqanê sey îzin, azadîya bi kefalet û tedawîya teberê hepisxane ra ameyî bêparkerdene.”
Sewbîna Hepisxaneyê Merkezî yê Îlamî de zî di birayê sporkarî, Emîrelî û Emad Zakerîferd ke protestoyanê çeleyê 2026î de ameyî tepîştene, hepisxaneyê Supaya Pasdaran de îşkenceyanê giranan ê fîzîkî û ruhî ra pey seba caardişê cezayanê xo ameyî şawitene hepisxane. Mehkeme de nê her di birayan rê 35 û 33 serrî cezaya hepsî û qamçî ameye birnayene.











