Ucreto tewr tay ê serra 2026î bi 28 hezar û 75 TL. Hemsera Genel Îşî ya DÎSK’î ya Hûmara 2. ya Şubeyê Amedî Sabahat Sever dîyar kerd ke ucreto tewr tayî de reyna dîyo ke waştişê karkerd û karmendan nêameyê qebulkerdene û vat: “Ucreto tewr tay binê sînorê vêşanîye de yo. Bi ucreto tewr tay waştişê kedkaran nêame ca.”
Komîsyonê Tesbîtkerdişê ucreto tewr tay bi sendîkayanê karker û karmendan Wezaretê Kar û Ewleyîya Komelkî kombîyayîşê xo yê 3. 23ê teşrîna peyêne de organîze kerd. Kombîyayîşî ra pey ucreto tewr tay ê serra 2026î hetê Wezîrê Kar û Ewleyîya Komelkî Vedat Işikan ra ame eşkerakerdene. Ucreto tewr tay se ra 27 ame vêşîkerdene û sey 28 hezar û 75 TL ame dîyarkerdene.
Ucreto tewr tay binê sînorê vêşanîye de mend
Dima ke ucreto tewr tay ame eşkerakerdene, sendîkayanê karker û karmendan û sazgehê komelkî vera kêmbîyayîşê ucreto tewr tayî xeylê reaksîyonî mojnayê. Goreyê daneyanê TURK-ÎŞî aşma teşrîna peyêne ya 2025î de sînorê vêşanîye seba keyeyo ke 4 kesan yeno pê 29 hezar û 828 TL bi. 29 hezar û 828 TL tena seba lazimtîyanê werd û şimitişî yê. Ucreto tewr tay ê seba serra 2026î zî bi 28 hezar û 75 TL. Ucreto tewr tay reyna binê sînorê vêşanîye de mend.
Xeylê sendîkayan dîyar kerd ke vera ucreto tewr tay do dest bi çalakîyan bikerê. Hemsera Genel Îşî ya DÎSK’î ya Hûmara 2. ya Şubeyê Amedî Sabahat Sever derheqê ucreto tewr tayî ke sey 28 hezar 75 TL ameyo eşkerakerdene qisey kerd û vera ci reaksîyon mojna.
‘Bi nê ucreto tewr tay reyde reyna waştişê karkeran nêameyê qebulkerdene’
Sebahat Sever dîyar kerd ke ê nê ucreto tewr tay qebul nêkenê û wina qisey kerd: “Tirkîya de krîzê aborî her ke şono zehmetêr beno. Mîyanê na rewşe de ucreto tewr tay ame dîyarkerdene. Wezaretê Kar û Ewleyîya Komelkî ucreto tewr tay eşkera kerd. La ma dî ke ucreto tewr tay binê sînorê vêşanîye de mend. Bi ucreto tewr tay waştişê karker, kedkar û karmendan nêameyê ca. Riyê vêşbîyayîşê enflasyonî ra her ke şono kedkar, karker û karmendî feqîr benê. Enflasyon vêşî beno, fatûrayê ma vêşî benê la ucreto tewr tay goreyê na rewşe vêşî nêbi. Bi nê ucretî kes nêeşkeno debara xo bikero. Ewro nê welatî de cuye vay a la kede erjan a. Îqtîdar bi zanayîş wazeno bi polîtîkayanê xo yê şaş şarî feqîr bikero. Ma reyna vengdanê îqtîdarî ke ganî ucreto tewr tay ganî goreyê cuyêka başe newe ra bêro dîyarkerdene. Keyeyêk de 2 kesî bixebitîyê zî nêeşkenê debara xo bikerê seba ke sînorê vêşanîye ucreto tewr tayî ra vêşêr o. Seba ney zî ganî ucreto tewr tay tewr kêm ganî bibo 45 hezar TL. Bi nê ucretî zî ganî ucreto tewr tay bireso sînorê feqîrîye.”
