Hemsereka DBP’yî ya Pêroyî Çîgdem Kiliçgun, deklarasyonê Newroze de qisey kerd û va ke “Ma emserr bi vengdayîşê aştî û komelo demokratîk ver bi Newroze şinê.”
Bi tewrbîyayîşê Hemserê Pêroyî yê DEM Partî Tuncer Bakirhan, Hemserekê Pêroyî yê DBP’yî Çîgdem Kiliçgun Uçar û Keskîn Bayindir, Hemserekê KCD’yî Berdan Ozturk, aktîvîstê TJA’yî, parlamenterê DEM Partî Mehmet Kamaç û Sînan Çîftyurek vernîya Sûranê Amedî de Berê Mardînî de deklarasyonê Newroza 2025î ame eşkera kerdene.
Çîgdem Kiliçgun Uçar deklarasyonî de dîyar kerd ke vengdayîşê Rêzdar Ocalanî seba înan rayberî keno û wina dewam kerd: “Newroza ke bi adirê xo ma rê bîya tîje, newroza ke bi nameyê xo ma rê bîya xoverdayîş, newroza ke bi xoverdayîşê xo ma rê bîya rayber, nika ra heme şarê ma rê pîroz bo.”
Kiliçgun derheqê manaya Newroze de wina vat: “Bawerîya Elewîyan de Heftemal est o. Vajîyeno ke dar û ber yeno secde, darî zî çok danê. Ma zî sey xoza yê, komel zî sey xoza yo. Xoza xo hîra keno ma zî wina yê. Ma zî xover danê û linganê xo ser o manenê. Newroze tarîxê kurdan de manaya xo wina ya.”
Uçar deklarasyonî de dîyar kerd ke Newroze tarîxê kurdan reyde girêdayeya û wina qisey kerd: “Demê Dehaqî de Kawayî senî xover da, ma zî nika wina kenê. Şarê kurdan xo kerd şarê newroze, domananê kurdan vera zordarî bi adirê newroze ver bi raştîye şîyê. Kam şî? Mazlum Dogan şî, Zekîye Alkan şî, Bêrîvan û embazê bînî şî. Ê ma rê bîyê mîjdanî. “Nê vengdayîşî de çi est o? No vengdayîş tarîxê ma ano ma vîrî, raştîya ma ano ma vîrî. Rêzdar Ocalan vano ‘metersê’, pêrodayîş û xoverdayîşê xo xo rê bikê rayber û komelo demokratîk bi destanê xo awan bikê. Ma zî kenê.”
Peynîya qiseykerdişê xo de Uçar, pêkerdişo ke vizêrî mabênê HSD û Sûrîye de ameyo viraştene, behsê ci kerd û va: “Ma verê zî vatbî ganî Sûrîye destê HTŞ’yî de tena nêmano. Ma paradîgmaya Rojawanî rê bawer kenê. Ma zanê ke fikr û paradîgmaya Rojawanî şarî rê roşnîye ano. Ma hêvî kenê ke no pêkerdiş bibo sebebê aştî û Sûrîya Demokratîke. Wa qirkerdiş çin bo kiştiş çin bo. Uca de kam bibo wa bi ziwan û kulturê xo biciwîyo.”
Çîgdem Kiliçgun Uçar qiseyê xo wina qedênayî: “Ma vanê ke wa na Newroze de Rêzdar Ocalan azad bibo û heme şaran rê azadîye bîyaro.”
Dimayê qiseykerdişan beşdaran adirê Newroze wekerd. Dima ra girseyî derûdorê adirî de govende girewte. Deklerasyon bi çoşêko gird qedîya.
