Serekê Dewletanê Yewbîyeyan ê Amerîka Donald Turmp, vat ke Tehranî ‘firsendê peymane xo dest ra remna’ û eşkera kerd ke ey vera Îranî “şerê aborî û tecrîdêko nêameyo vînayîş’ dayo dest pêkerdene.
Serekê DYA’yî Donald Trumpî parekerdişê xo yê platformê medyaya dîjîtale ya Truth Socialî ser o de wina vat, ê firsendêko gird da Îranî ke peymaneke virazo, la Îranî nê firsendî ra îstîfade nêkerd.
Trumpî vat: “Ez ewro vera welatêk, tedbîranê ekonomîk yê tewr bihêz ê ke heta nika nêameyê vînayîş, eşkera kena.” Sewbîna vat ke ê vera Îranî “Şerêko ekonomîk û tecrîdêko ke heta nika nêameyo vînayîş” da dest pêkerdene.
‘Şerê ekonomîk û tecrîd’
Trumpî eşkerayîya xo de “Ez ewro vera welatêk, operasyonê ekonomîkî yê tewr bihêz ê ke heta nika nêameyê vînayîş, eşkera kena! Fîloyê înan çin bî, kuwetê înan o hewayî îmha bî, fabrîkaya leşkerî sey xirbe bî, perê înan bi bêqîmet û welatê înan tîtaleke ser o yo. Sewbîna ewro ra dima dezgehê fînansî, sazgehî, teyaragehî û dezgehê dewletan, kamcî dewlete bena wa bibo, hetkarîya Îranî bikero do welatê înan zî tedbîranê tewr girdan ê ekonomîk reyde rî bi rî bimano.”
DYA’yî muttefîqanê xo ra destek vaşt
Donald Trumpî vat ke “Qaçaxîyê petrolî, xetê dayîşûgirewtişî, transferê pereyê, buroyê dovîzî, sîcîlê keştîyan, şîrketê paravanî ganî nê pêro nika bêrê vindarnayîş.” Trumpî vat û vengdayîş kerd: “Şima zanê şima kamê.” Trumpî dewamê qiseyê xo de vengdayişê heme muttefîqanê xo kerd ke kişta DYA’yî de vinderê ke Îranî bigêrê binê tecrîdî û maxlûb bikerê. Trumpî wina dewam kerd: “Nê xîntî tengedeyê û nê tedbîrê tarîxî do înan û muttefîqanê înan felç bikerê. Îran, do qetî nêbo wayîrê çekê nukleerî.”
