Grûbanê Terefgir ê Amedsporî eşkera kerd ke ê binê nameyê ‘Meclîsê Terefgiranê Amedsporî’ de ameyî têhet û do maçan de peyê kelaya başûrî de bêrê têhet.
Nêzdîyê di aşmî yo ke grûbê terefgiranê Amedsporî semedê yewbîyayîşêko pêroyî mîyanê xebatan de bîyê. Xebatan netîce da û pêro grûbê terefgiranê Amedsporî binê nameyê “Meclîsê Terefgiranê Amedsporî” de ameyî têhet. Pêro grûbê terefgiran do maçan de peyê kelaya başûrî de bêrê têhet û trîbun de cayê xo bigîrê. Amedsporî zî hesabanê xo yê medyaya dîjîtal ser o eşkerayîyêk daye û pêameyîşê terefgiran pîroz kerd.
Eşkerayîya Amedsporî wina ya:
“Di aşmî yo ke bi netîceyê xebat û îstîşareyanê gird ê terefgiranê ma binê banê ‘Meclîsê Terefgiranê Amedsporî’ de ameyî têhet. Ma nê pêameyîşî û goreyê menfeetê klûbê ma awankerdişê yew trîbune bi keyfweşî pêşwazî kenê. Goreyê qerarê terefgiranê ma, peyê kelaya vakûrî de do fikarê ewleyî vejîyê meydan, aye ra zî do peyê kelaya başûrî de trîbune bêra awankerdene. Ma sey Amedsporî na game pozîtîf vînenê ke do ruhê yewbîyayîş, pêseramayîş û paştîdayîşê bihêztir awan bikero û na game do paştîdayîş bido kulturê trîbune zî. Terefgirê ma yê ke nê gaman de keda înan est a, ma înan pîroz kenê.”
