Fransa’de serra 2025’î de, deme akerdişê wendegehî ra ver, 2.159 doman, înan ra 503 teney domanê putî, mecbûrê ke kuçe de bimanê. Serra 2024’î de 38 domanî merdî. Qiseyê hukmatî yê “Yew doman zî kuçe de nêmaneno” raşt nêvejîya.
Fransa de rojê verê akerdişê wendegehî ver, goreyê malumatê ke weşanîyayî, krîzê cîwîyayîşî yê welatî hetê domanan ra resayo halêke giran. Goreyê raporê UNICEF û Fédération des acteurs de la solidarité (FAS) yê ke ewro eşkera bîyî, tenya şewa 18-19 aşma Tebaxe de 2.159 doman, înan ra 503 domanê putî yê hîrê serrî ra cêr, cayê maneno nêdîyî û mecbûr mende ke kuçe de bimanê.
Na hûmar, tenya keyeyanê ke hêtê acîlî yê 115’î telefon kerdo, înan gêno. Heta ke xet tim meşgûl o û xeylêk keyeyî bihêvî ra serdayîş nêkenê, humara raştîn zafêr a. Tena nê îstatîstîkî, domanê ke bêkesanê teberî yê, domanê ke babetanê qaçaxan de yan zî bananê ke îşxal bîyî de cîyenê, nêgênê.
Serra 2022’î de hukmat qisey kerdbi, “Yew doman zî kuçe de nêmano.” Labelê hîrê serrî ra dima tablo çewt vejîya: Hûmara domananê ke kuçe de mendî, %30 zêdîya. Serra 2022’î ra dima, hûmara domananê putî yê hîrê serrî ra cêr ke kuçe de mendî, %37 berz bîye; tenya şewa 18-19 aşma Tebaxe de 171 domanê ke kuçe de mendî, yew serre zî nêkerdî.
UNICEF û FAS, bi va “Fransa serra 2025’î de, domanî kuçe de benê, kuçe de benê gird û kuçe de mîrenê” û hişyarî kerda. Serra 2024’î de 855 merdimî kuçe de merdî û înan ra 38 domanî bî. Nê domanan ra 26 teney panc serrî ra cêr bî; 18 teney zî hema yew serre nêkerdî.
Wezîfeyê Dewlete ya zî dewlet wezîfedar a?
Wextê ke Macron serra 2017’î de amê hukmat, hûmara bêbanan Fransa de di qatî zêdîya û resaya 350.000 kesan. Banê komelî yê ke bêsînorî yê, merkezê cîwîyayîşê acîlî yê ke tim pîrê yê û polîtîkayê aborîye, zafêr domanan rê zerar danê. Sereyê FAS’î Pascal Brice, munaqeşeyê budçe yê 2026’î ra ver hukmat rê veng da: “Ser rûmetê şarî tasarruf nîno kerdene. Meclîs, nêeşkeno ser cuyaya merdiman planê aborîye bikero.”
