Sîsê Bîngole dayîkêka birindara çike hîrê domanê xo şer de kerdê hard. Seba proseso newe wina vana: “Şikir ke yênê werê. Endî rindîye bêro, no bero ke mendo raxelesîyo. Aştî rind a.”
Sîsê Bingole dewa Badan a ke (Tekneduzu) girêdayeyê Gimgimî ya, uca de ciwiyena. Emrê xo 84 o. Sebebo ke nan û awe daya gerîlayanê PKK’yî 6ê nîsana 2016î de erzenê serê keyeyê aye û aye destbend kenê. 23ê hezîrana 2016î de pê qerarê mehkema kewena hepisxane û 3 aşmî ra tepîya vejîyena. La belê 10 aşmî ra dima na dosya ser o bi îdîaya “Rêxistine rê bi zanebîyayene kerdişê hetkarî” 4 serrî û 2 aşmî ceza danê ci.
Çend neweşîyê xo sey şekir, astim, tansîyon û zere bîyê. Dewlete qaytê kokimîya Dayîka Sîse û nêweşîyanê aye nêkerd. Berde kerde hepisxaneyê Mûşî, badê berde Hepisxaneyê Tarsûsî. Unîversîteya Mersînî a Fakulteya Tipî raporê “Hepisxane de nêşkena vinda” da ci reyna zî nêameye raverdayene. Dayîka Sîse adara 2019î de tehlîye bîye. Pêro pîya hepisxane de serrêk û hîrê aşmî manena.
‘Nika berbayîşê mi nêmendo’
Nika 84 serrî ya û nê rojanê ke ma ver bi aştî şonê, dewa xo Badan de ciwîyena. Seba aye aştî teyna henî waştene nîya; aştî seba aye rojê rind ê, azad ê ke domananê aye seba ci ganê xo dayo, çîyêdo henên a. Ma ke qalê aştî kenê çimê dayîka Sîse biriqînê. Wexto ke qalê qicanê xo kena o wext cî xem û dec ancîno çimanê aye. Vana, “Ez henîke berba nika berbayîşê mi nêmendo. Hêstirê çimanê mi nênê.”
Emrê Dayîka Sîse dima domananê aye verdo ra. Se ameyê kiştene, se xebere girewta, se kewta dima cenazayanê domananê xo, yew bi yew ma rê qisey kena.
‘Xêro ke mi hevalan ra dî, ma û pîyê xo ra nêdî’
Wexto ke serranê xo yê ke hepisxane de vêrdê ra qalê înan kena, hebê çimê xo biriqînê vana îyê zerî gardîyanî û midurî zî tey hevalanê aye yê hepisxaneyî û qomê aye yê teberî pêro pîya cira wayîr vejîyê. Çetinîya hepisxaneyî bi na wayîrvejîyayene hebê bîya şenik. Seba hevalanê xo yê hepisxaneyî vana “Hevalî zaf rindî bî. Hevalî dem û dewran bê. Xêr o ke mi hevalan ra dî ma û pîyê xo ra nêdî.”
Prosesê werêamayîşî cira persenîme cumleya dayîka Sîse ya verêne “Şikirke yênê werê” ya. Seba domanê xo û şehîdanê bînan vana “Xora înan emrê xo da şî. Naye ra dime gencî nêşorê. No bero ke mendo raxelesîyo.”
Dayîka Sîse ma ebi kêfweşîye û zero germ kena raye.
