Êlih – Endama Sekreteryaya Înîsîyatîfê Yewîya Demokratîk Songul Korkmaz dîyar kerd ke rixmê Prosesê Aştî û Komelê Demokratîk, dewleta Tirkîya hema zî dewanê Başûrê Kurdîstanî ra nêvejîyaya. Songul Korkmaz îfade kerd ke, dewleta Tirkîya ra teber, dewleta Îranî zî rojanê peyînan de hêrişê xo Başûrê Kurdîstanî ser o zêde kerdê. Netîceyê hrêişanê Îranî de xeylî kesî cuya xo vindî kerd û vat: “Ma hêrişê ke vera Başûrî benê çi rey qebul nêkenê.”
Rojanê peyînan de, rixmê Prosesê Aştî û Komelê Demokratîkî, cografyaya Kurdîstanî ser o xeylî herêman de hêrişê hema zî dewam kenê. Herêma Başûrî Kurdîstanî nê herêman ra yew o. Her roj hêrişî herême ser o zêde benê.
Leşkerê Tirkan, demêko derg o ke Başûrê Kurdîstanî de îşxal û dorpêçê xo domnenê. No dorpêç tesîrêko gird cuya şarê herême ser o kerdo û nêverdenê ke dewijî bi hawayêko serbest agêrê dewanê xo.
Hêriş û dorpêçê dewleta Tirkîya ra teber, demanê peyînan de rejîmê îranî zî Başûrê Kurdîstanî ser o hêrişê xo bi hawayêko şîdet zêde kerdê, hema-hema her roj herêmeke bombarduman kena. Netîceyê nê bombardumanan de xeylî pêşmerge û sîvîlî cuya xo ra bîyî.
Endama Sekreteryaya Înîsîyatîfî Yewîya Demokratîk Songul Korkmaz derheqê dorpêç û hêrişanê Başûrê Kurdîstanî ser o ajansê ma (AW) rê qisey kerd û îfade kerd ke ê do her game vera nê hêrişan vinderê û çi rey nê hêrişan qebul nêkerê.
‘Ganî peynîya dorpêç û hêrişanê ke Başûrî ser o benê bêro’
Songul Korkmaz destpêkê qiseyê xo de dîyar ke, seke dorpêçê dewleta Tirkîya Başûrê Kurdîstanî de dewam kena, dewleta Îranî zî nê rojanê peyînan de herême de hêrişê xo zêde kerdê û vat: “Demêko derg o ke dewleta Tirkîya bi manaya polîtîkayanê ewleyî dewanê Başûrê Kurdîstanî de zext û hêrişanê domnena. Seba ke her çar parçeyanê Kurdîstanî û Rojhelatê Mîyanên de şer biqedîyo, ma do sey înîsîyatîfî, vera nê polîtîkayanê şerî vinderi û têkoşînê xo xurtêr bikeri. Ma nê polîtîkayanê şerî ke yenê rayra berdiş, her game şermezar kenê û hêrişanê Başûrê Kurdîstanî ser o çi rey qebul nêkenê. Wexto ke merdim nêeşko herre û hêgayanê xo ser bi hawayêko azad biciwîyo û bigêro, no dest ser nayena heqê cuye yê merdimîye yo. Xora nê hadîseyan ra, Rojhelatê Mîyanên bîyo warê şerî û hêrişê sîvîlan ser o zêdeyîr benê. Nika zî dewleta Îranî, Başûrê Kurdîstanî de hêrişê welatijan kena û netîceyê nê hêrişan de xeylî kesî cuya xo ra bîyî. Nê semedî ra ganî ma sey şarê kurdî vera nê polîtîkayanê şerî reaksîyonêko xurt bi mojnê ra. Ma do sey înîsîyatîfî seba yewîya şarî kurdî xebatanê xo xurtêr bikerê.”
‘Ganî hendî Birêz Ocalan bi fîzîkî azad bibo’
Songul Korkmaz bale ante vengdayîşê Aştî û Komelê Demokratîkî ê Rayberê Şarê Kurdî Abdullah Ocalanî ser o ke 27ê sibata 2025î de amebi kerdene û qiseyê xo wina domna: “Badê vengdayîşê Rayberê Şarê Kurdî Abdullah Ocalanî, Têgêrayîşê Azadîya Kurdîstanî berpirsîyarîya xo bi ca ard û çekê ronayê. Nika êdî dorê dewelete yo ke gamanê şênberan û fermi Bierzo. Ganî qanûnê ke do bêrê viiraştene tayê vurîyayîşê fermî bêrê kerdene ke Birêz Abdullah Ocalan bi hawayêko fîzîkî azad bibo. Ganî heqê ey yê hêvîye lezabez bêro caarden. Ma do seba nê amancî sîyasetê demokratîkî hîna xurt bikerê. Birêz Abdullah Ocalan pêvînayîşê xo yê peyîn de zî bale ante şeklê awankerdişê sîyasetê demokratî ser o. Nê semedî ra ganî meclîs êdî gamanê şênberan Bierzo û rayîr vernîya sîyasetê demokratîk akero. Seba ke no proses aver şêro, gamêke bêrê eştiş ganî nêrê ereykewtene. Hêvîyê ma no yo ke verê betlaneyî taslakê qanûnê çarçewayî bêrê meclîsî û seba embazanê ma yê ke zîndanan de yê zî gamî bêrê eştiş.”
‘Ganî êdî azadîya fikrî û xoîfadekerdişî sey suc nêrê vînayîş’
Songul Korkmaz dîyar kerd ke nê prosesî de zafêrîya komelî hemfikir o, hewcedarîye sîyasetê demokratîkî esta û wina vat: “Ganî heme şar û heme bawerî bîeşkê dîyayîş û fikranê xo bi hawayêko azad bîyarê ziman. Tirkîya de hema zî azadîya fikrî û xoîfadekerdiş sey ‘suc’ yeno qebulkerdiş. Nê semedî ra bi hezaran embazê ma zindanan de yê. Ganî êdî no dîyayîş bêro vurîyayene. Xeylî roşnvîr, nuştox, hunermend û beşanê cîyayan yê komelî aştî û demokrasî wazenê. Ganî ma bingeyê demokrasîye de heme beşanê komelî reyde hemkarî bikerê, yewbînan bi eşnawê û dayîşûgirewtiş bikerê. Sewbîna ganî warê aştî û sîyasetê demokratîk de zî averşîyayîşî bibê. Gerîlayan çekê xo veşna. Nika zî dorê dewlete yo ke gaman bierzo û qanûnan ke azadîye garantî kena hedre bikera. Eke nê gamî biameyne eştiş, ma do ewro xeylî probleman bi hawayêko asan çareser bikerdêne.“
