Vîrardişê ke bi pêşengîya MEBYA-DER’î ya Amedî de virazîyayê hîrê rojî dewam kerd, bi mojnayîşê sînevîzyonî û bi sloganê “Şehîdî Nêmirenê” qedîya. Qiseykerdoxan dîyar kerd ke şehîdî pêşengê rayîrê înan ê û vat ke ê bi şehîdan serberz ê.
Vîrardişê ke bi pêşengîya MEBYA-DER’î ya Amedî, seba cangorîyanê Têgêrayîşê Azadîya Kurdîstanî yê ke tarîxanê cîyayan de cuya xo ra bîyî, salona dawete ya Geterler a qezaya Rezanî ya Amedî de ameyî viraştene, bi mojnayîşê sînevîzyonî qedîya. Keyeyê cangorîyan, temsîlkaranê partîyanê sîyasî û rêxistinanê komelê sîvîl tede bi hezaran kesî tewrê vîrardişî bîyî.
Vîrardiş de xeylî rayan sloganê “Wa Biciwîyo Serek Apo”, “Şehîd Nêmirenê”, “Bê Serek cuye nêbena”, “Rayîrê şehîdî rayîrê ma, Apo Serekê ma yo” û “Rayîrê şehîdî rayîrê ma, PKK partîya ma ya” ameyê berzkerdene. Sewbîna fotografê gird ê Rayberê Şarê Kurdî Abdullah Ocalan cayê vîrardişî de ame akerdene. Fotografê cangorîyan zî bi alanê kesk û sûr û zerd ameyê xemilnayene û masaya fotografanê cangorîyan ser o vile û mûm ameyê ronayene. Vîrardiş bi deqîqeyêk rêzgirewtişî dest pêkerd û marşê “Çerxa Şorişî” ame wendene. Badê rêzgirewtişî û wendena marşî, girse sloganê “Şehîd Nêmirenê” berz kerd.
‘Aştî do bêro û ma do serkewê’
Waya pêşengê PKK’yî Hayrî Durmûş, Zekîye Ayike îfade kerd ke çiqas dejê nê şarî zêde bibo zî, ey ra zêdeyêr cîwananê nê şarî kede dayê û wina vat: “Destpêke de selamê xo Rayberê Şarê Kurdî Abdullah Ocalan û keyeyanê şehîdan rê kena. Dayîkno, pîy û birano, şarê kurdî rind zaneno dejê keyeyan zêde yo la keda nê şehîdan zî zêde ya. Gedeyê nê şarî xeylî dej û keder dîyî. Zêdeyêrê 40 serrî yo ke gedeyê nê şarî seba şarê xo têkoşîn kenê û cuya xo vîndî kenê. Ganî ma wayîrê yewbînan vejîyê, şerê ma hîna nêqedîyayo. Rêzdar Ocalanî no şer vindarna. Ganî ma cîwananê xo rê bibê hêz û qewet. Xeyrî vato ez deyndarê nê şarî ya, belê ma hema zî deyndarê nê şarî yê. Ez rêzdar Ocalanî selam kena û ez bawer a ke aştî do bêro û ma do serkewê.”
‘Serek Apo û keda şehîdan ma dardekerdiş ra berdê masaya muzakereyî’
Dima ra Alî Haydar Elyakût, ke badê 32 serran hepîsxaneyî ra vejîyabi, qiseykerd. Alî Haydar Elyakûtî dîyar kerd ke eke ê ewro bieşkê qisey bikerê û biciwîyê, bi saya şehîdan o û wina vat: “Ge-ge ma rê vanê şima senîn hîris serrî zîndanî de mendî, bi saya şehîdan ma mendê, ê ma rê bîyî hêz û bîyî moral. Ma do seba ke no proses bireso netîceyî û Serok Apo azad bo, têkoşînê xo domnenê. Ewro saya şehîdan prosesêk dest pêkerd. Serek Apo û keda şehîdan ma dardekerdiş ra berdê masaya muzakereyî. Nê pêro bi saya nê şehîdan o. Şehîdê ma pêşengê rayîrê ma yê û şehîdî nêmirenê.”
‘Têkoşîna înan bi felsefe, embazî û fikranê Rêzdar Ocalanî derbazê astêka muhîm bî’
Parlamentera DEM Partî ya Amedî Adalet Kaya zî destpêkê qiseykerdena xo de keyeyan, şarê kurdî, Têgêrayîşê Azadîye û Rayberê Şarê Kurdî Abdullah Ocalanî rê serweşîye waşt û wina vat: “Her cayê Kurdîstanî de şarê kurdî werişt lingan ser û wayîrê cangorîyanê xo vejîyayê. Ma bi keye û şehîdanê xo serberz ê, şima her bibê û her biciwîyê. Ewro hîrê rojî yo ke şarê Amedî cayê şînî de qefle bi qefle zîyaret keno, no çî seba ma rûmetêk o. Her gama cuyayîşê ma de keda şehîdanê ma est a. Estbîyayîş û xobîyayîşê ma bi keda înan ame awankerdene. Qehremanîya înan tesîrêko gird cuyayîşê ma ser o kerd. Têkoşînê înan tena bi çekî nê bî, bi felsefe, embaztî, heskerdiş û fikranê rêzdar Ocalanî derbasê astêka muhîm û manadar bî, ma bi înan serberz ê, şehîdî nêmirenê.”
Badê qiseykerdişan sînevîzyono ke fotograf û vîdeoyanê cangorîyan û erjnayîşanê Rayberê Şarê Kurdî Abdullah Ocalanî ra ware ameyêne, ame mojnayene. Vîrardiş bi çepik û sloganan qedîya.
