Silêmanî des hezaran kesî seba piştgirîya Rojavayê Kurdîstanî rayra şonê. Rixmê hewayo serdin û vewre zî girse sloganê, “Yek e yek e yek e, Kurdîstan yek welat e” sey lasere herikîyenê.
Şarê Silêmanî ke roja ke hêrişî vera Rojavayê Kurdîstanî dest pêkerdê heta nika lingan ser o yo, bi rayîrşîyayîşêko bi heybet piştgirîya xo roja çarine de zî domneno. Rixmê hewayo serdin û vewre zî rayîrşîyayîşo girseyî yê seba xoverdayîşê Rojavayê Kurdîstanî Silêmanî de dewam keno. Girse Baxê Giştî de ame têhet û bi slogananê piştgirîya xo ya seba Rojava mojnenê, rayra şono.
Şar bi israr rayra şono
Her çend riyê rewşa hewa û varayîşî vewre ra qerar amebi girewtene ke rayîrşîyayîş bêro taloqkerdene la şar seba kerdişê rayîrşîyayîşî bi israr bi ke piştgirîya xo seba Rojavayê Kurdîstanî bimojno. Rayîrşîyayîşî de xeylê çalakîkerê sîyasî û sîvîl, nuştox, rojnameger, hunermend, temsîlkarê sendîkayan, cinî, ciwan û welatijê şaristanî amade yê.
Rayîrşîyayîşî de bi desan pankart û dowîzê girêdayîyîya şarî ya Rojavayê welatî reyde îfade kenê, ameyê akerdene û girewtene. Girse demê rayîrşîyayîşî de bêmabên sloganê, “Yek e yek yek e, Kurdîstan yek welat e”, “Kîne em: Kurd in em”, “Jin jiyan azadî”, “Bijî berxwedana Rojava û şervanan”, “Rojava ne bi tenê ye, deriyê azadiyê ye” û “Rojava Kurdistan e Başûr piştevan e” vatê.
Hûmara girseyî resaye se hezaran
Dewamê rayîrşîyayîşî de çend ke şono hûmara beşdaran vêşî bena. Nê deman de hûmara girseyê rayîrşîyayîşî de se hezaran vîyarte. Rayîrşîyayîşî de xeylê pankartê, “2+2=1” ameyê girewtene. Çalakîkeran bi taybetî sloganê hemverê polîtîkayanê Tirkîya de vatê û Serekkomarê Tirkîya Erdoganî protesto kerdê.
Çalakîkeran bi megafonan marşê derheqê Rojava de wendê. Bi taybetî girseyî bi yew vengî beşdarê megafonî marşê, “Bijî bijî Rojava” bi. Rayîrşîyayîş bi coşêko gird dewam keno.
