Serekwekîlê Grûba DEM Partî Sezaî Temellîyî îfade kerd ke verê ke Meclîs şêro tehtîl, seba ke qanûnê çarçewa bêro rojev mutabakatêk est o û wina vat: “Pêşnîyazê ke yenê Meclîs, heme nêbenê qanûn. La ma hêvî kenî ke heme partî nê qanûnî ser o bibê yew û nê qanûnî vejê.”
Serekwekîlê Grûba DEM Partî Sezaî Temellî Meclîs de kombîyayîşê çapemenî viraşt. Sezaî Temellî qiseykerdişê xo de semedê serrgêra qirkerdişê Madimakî kesê ke cuya xo ra bîyî, ê ardê xo vîr û wina dewam kerd: “Hema zî berpirsîyarî nêameyê cezakerdene û faîlî bêceza ameyî verdayene. Hema zî seba welatijanê ma yê elewîyan ziwanêko nîjadperest yeno şuxulnayene. Madimak ra heta Qoçgîrî ma heme qirkerdişan şermezar kenê.”
Paketa hukmî
Sezaî Temellîyî bale ante paketa newîye ya hukmî ser o û wina vat: “Çunke Meclîs zimistanî nexebitîya, tehtîlê Meclîsî yê aşma temmuze yeno dergkerdene. Naye ra ke paketê neweyî yê hukmî yenê vernîya ma. Qerarê ke hetê Mehkemaya Desturê Bingeyinî ra ameyî betalkerdiş, la hetê îqtîdarî ra reyna yenê vernîya ma ke bibê qanûn. Heta nika 12 paketê hukmî Meclîsî ra derbas bîyî. Şima nê 12 paketan bidê têver, merdim vîneno ke nê 12 paketî zî nêbenê cewabê pawitişê edaletî yê şarî û bêedaletîye hîna zêde kenê. Hema zî caardişê qeyûman dewam keno. Hema zî qerarê Mehkemaya Heqanê Merdiman a Ewropa nêameyê caardene. Nê paketan de çîyêko winasîn çin o. Vanê ma do qerardayîşê mehkemeyan lezêr bikerê. Mehkemeyan de bêedaletî est a. Eke şima qerarê mehkemeyan lezêr bikerî, şima do bêedaletî zî lezêr bikerê. AKPyî vatêne ma do YOK’î wedarnê, la badê ke ameyê îqtîdar, YOK hîna biqewet kerd. Bêkalîtebîyayîşê unîversîteyan hîna zaf beno. Heto bîn ra xizanîya wendekaranê unîversîte zî zêde bena. Sewbîna zî akademîsyenî nê halî de yê. La paketêka ke nê probleman hel bikera, a zî çin a. Ma eşnawit ke paketêka ke tedayê serê unîversîteyan hîna zaf bikera do bêra rojevê Meclîsî, la hema nêameya.”
‘NATO rêxistinêka şerî ya’
Sezaî Temellîyî dîyar kerd ke tesîrê zîrweyê NATO’yî do 10 serrî dewam bikero û wina qisey kerd: “Seba zîrweyî NATO’yî her cayê Anqara ameyî padayene û zaf kesî ameyî destbendkerdene û girewtene. NATO rêxistinêka şerî ya. NATO şer û pêkewtişan vejeno. Netîceya nê zîrweyê NATO’yî de do şerê neweyî vernîya ma de bibê. Ma vera şerî yî, aye ra ma NATO’yî rê vanî ney.”
‘Krîzê ekonomîk çiqas şino zêde beno’
Sezaî Temellîyî dîyar kerd ke welatijî seba xizanîye nêşinê debara xo bikerî û qiseykerdişê xo wina domna: “Feqîrîya mîyanê şarî çiqas şina zêde bena. Her kes xizan beno. Ganî meaşê asgarî aşma temmuze de bêro berzkerdene. Seba ke vernîya xizanîye bêra girewtêne, hewceyî bi polîtîkayêka newe ya ekonomî est a. Ganî çimeyê ekonomîyî tena seba sermayedaran nêbê û heme welatijan rê bi qaydeyêko seypê bêrê parekerdene. Seba ney zî ma do peynîya hewteyî de Amed de Komxebata Ekonomî virazê û ma amadekarîya ci kenê.”
‘Mutabakatêk est o’
Sezaî Temellîyî derheqê persê serê qanunê çarçewa de zî da zanayene ke verê ke Meclîs bikewo tehtîl, seba ke no qanûn bêro rojev mutabakatêk est o û wina vat: “Pêşniyazê ke yenê Meclîs heme nêbenê qanûn. La ma hêvî kenî ke heme partîyî nê qanûnan ser o bibê yew û no qanûn vejîyo. Meclîs eşkeno mabên zî nêdo û xebata xo derg bikero.”
