Kendawa Basra û Neqebê Hurmuzî de krîzê mabênê DYA û Îranî bi gamanê neweyan dom keno. Hêrişê di hetî yê serê keştîyanê şerî û tankeranê petrolî, roj bi roj tora bazirganîya dinya leqnê û vayîya varîlê petrolê Brentî heta 99 dolaran berz kerd. No raverşîyayiş hetê temînkerdiş, vayîye û ekonomî de Tirkîya û zaf dewletanê bînan ser tesîr bikero.
Fermandarîya Hêzanê Merkezî yê DYAyî (CENTCOM) da resnayene ke ciwabê hêrişanê fuzeyanê Îranî ameyo dayene û Kendawa Basrayî de 5 tankerê petrolî yê Îranî ameyê îmhakerdene. Naye ser, Artêşa Pasdaran a Îranî zî eşkera kerd ke înan 2 keştîyê şerî yê DYAyî û 8 tankerê petrolî birîndar kerdê û 10 keştîyê bînî zî hedef girewtê. Îranî bine xêz kerd ke kontrolê Neqebê Hurmuzî destê înan de yo.
Vaya petrolî ver bi tîtike şino
Astengkerdena trafîkê behre ya Neqebê Hurmuzî rasterast tesîr serê pîyasa kerd. Vaya petrolê Brentî reste 99 dolaran, zor dano sînoro psîkolojîk ê 100 dolarî. Pisporê enerjîyê hişyar kenê ke alozîyê leşkerî yê herême vaya petrolî demêko kilm de 100 dolarî bidê derbaskerdene.
Zamê neweyî raye de yê
Zêdebîyayena nîya leze yê vaya petrolî Tirkîya de zî rîskê vayîkerdene ano rojdem. 4ê Êlune de 8 lîre û 24 quriş zam mazotî ser amebî kerdene, babokîye est a ke nê alozîyanê Neqebê Hurmuzî ra dima pêlê zamanê neweyan ê giranan bêro serê petrolî.
