Seba şarê herême ke badê hêrişanê vera Rojawanî cayê xo ra ameyê şawitene, Amedî de kampanyaya ardimî dest pêkerde. Îdareyo Otonom vera krîzê însanî yê herême ke badê hêrişanê dewleta îşxalker a tirk û çeteyanê aye ameyê meydan, xebatanê xo dewam keno.
Partîya Herêmanê Demokratîkan (DBP) îlan kerd ke seba têpiştîdayîş reyde şarê ke cayê xo ra ameyo şawitene, dest bi kampanyaya ardimî kerdo. Bi beyanatê çapemenîye ke Rêxistina DBPya Şaristanê Amedî de ame organîzekerdene kampanya dest pêkerd. Hemserekê DBPyê Amedî Mehmet Şîrîn Gurbuz ke tîya de qisey kerd, qeyd kerd ke vera heqê ciwîyayîşê şarê Kurdî hêrişî benê û dîyar kerd ke SMOyo ke Tirkîya piştî dano ci û Sûrîya Bakur û Rojhelatî de hêrişan keno, DAÎŞ o ke nameyê xo û şeklê xo vurîyayo. Gurbuzî va: “Polîtîkayê ke heqê ciwîyayîşî nedanê şarê kurdî, şer û tecrîd-îzolasyonî ra fek veradê. Resmê ke medya de vejînê bi raştî îbret danê. Ma bi zîhnîyetêk de rî bi rî yê ke vera cinî, erd û însanîye dişmen o.”
‘Hêrişo ke Rojawanî ser bîyo sey o yo ke Amed ser bîyo’
Gurbuzî ke hêrişê ke herêmanê Rojawan û Kurdan ser bîyê sey hêrişê ke Amed ser bîyê name kerd û va: “Ma wina wazenê îfade bikê ke ma sey şarê Amed û Kurdistanî vera nê tewir hêrişan qet bêveng nêmendê û nêmanenê. Ganî ma seba temînkerdişê şertanê ciwîyayîşêko aşitîyane, kerdişê muzakereyan tecrîdê Îmralî bişiknê û ganî muzakere Abdullah Ocalan reyde bêrê kerdene û pêşnîyazê ey bêrê girewtene.”
‘Ma hêz bidê kampanyayanê ardimî’
Gurbuzî ke behsê ruhê Kobanî kerd û va: “Ma hêz bidê kampanyayanê ardimî û piştîdayîşî yê ke do dest pêbikerê. Senî ke bi ruhê Kobanî heme şaran cehd û xîret mojnayo û şarê Kurdî uca de tena nêverda, ewro reyna şarê Rojawanî paweyê ardim û piştîdayîşî şarê Kurdistan, şaranê Tirkîye û heme însanan ra keno. Desto ke derg beno destê biratîye yo, her desto ke derg beno merdimîye rê derg beno.”
‘Zerrîya ma şaranê Rojawan û Sûrîye reyde ya’
Hemsereka DBP ya Amedî Sultan Yaray ke dîyar kerd ke seba hêrişan, însanî mecbur manenê ke koç bikerê, wina veng da şarî: “Destê xo ronê wijdanê xo û paştî bidê kampanyaya ma ya ardimî. Qasê ke destê şima ra yeno betanîye, kinc, werd, sol û erzaq arê bidê û resnê binayê qezayanê ma ke ma destê xo biresnê Rojawanî. Wa şarê Rojawan û Sûrîye bizano ke zerrîya ma înan reyde ya. Ma do qasê ke destê ma ra çi bêro ma do seba înan bikê. Seke şima zanê zaf kesî ke kewtê rayîr nêweş û astengdar ê. Wa no şer biqedîyo. Ma nika ra destê xo yê ardimî biresnê Rojawanî. Kampanyaya ma ewro ra dest pêkena. Şarê Rojawan û Sûrîye tena nîyo. Ma sey şarê Kurdî do destê xo yê ardimî biresne. Kamca de beno wa bibo ma do kesî ke raştê neheqîye û bêhuqûqîye ameyo înan het de bibê. Ma do înan tena nêverdê.”
