Hozan Bengî serrra 2020 de seba ke deyîrê Kurdkî vatê ame girewtene û dimayê 5 serrî û 4 aşman nika ame veradayene. Hozan Bengî wazeno reyna heskerdoxanê muzîkê Kurdkî reyde bêro têhet û dîyar kerd ke teda û zordarî merdiman hişyar kenê û hunerî danê afirnayîş.
Teda û zordarîya dewlete erjanê neteweyî yê kurdan ser o tehlukeyêka girde xo reyde anê. Yeno zanayene ke heta nika xeylê polîtîkayê tedayî encamê giranî xo reyde ardê û hunermendan ra heta nuştox û roşnvîrê kurdî erdê xo terk kenê û şonê welatanê xerîb. Hûmarêka nê kesan zî rixmê heme teda û zordarîyan zî xover danê û têkoşînê xo yê kulturî domnenê. Nê kesan ra yew zî Hozan Bengî (Ersîn Akbaba) yo ke seba ke deyîrê kurdkî vatê û beşdarê programan bîyo serra 2020 de ameyo girewtene û 5 serrî hepisxane de mendo.
Serranê 2005 û 2006î de keweno mîyanê muzîkê Kurdkî
Hozan Bengî dewa Încesû ya girêdayeyê qezaya Tekmanî ya Erziromî yo û serra 2003î ra nat Stenbol de ciwîyeno. Ey serranê 2005 û 2006î de qerar dayo ke bikewo mîyanê karê muzîkî û dest bi vatişê deyîranê Kurdkî kerdo. Rîyê şert û mercanê cuye ra çend serrî muzîkî ra dûrî keweno. Dma serra 2011î de reyna dest bi muzîkî keno û heta nika zî bi hewayêko aktîf mîyanê karê muzîkî de yo.
Seba deyîranê Kurdkî ra yeno girewtene
Hızan Bengî ewilî grûbêk reyde şono veyve û şayîyan la dima ra nêzdîbîyayîşê şarî seba kulturê Kurdkî karê muzîlî bineyna bi hewayêko profesyonel keno. Dima ra Newroz û mîtîngan de ca gêno. Huner û têgêrayîşê ey o polîtîk seba sîstemî beno astegîyêk û sîstemî verê xo da ey ke vernîya ey bigîro. Seba ke deyîrê Kurdkî vatê û vejeyo programan Hozan Bengî rê ceza yena û 5 serrî hepisxane de girewte maneno.
‘Erjo ke merdim dano dayîke ganî bi ziwan bêro peymawitiş’
Hozan Bengîyî dîyar kerd ke ganî hunermendî heme çî ra ver qîmet bido ziwanê dayîke û ganî heme qadan de bi ziwanê xo qisey bikero û biafirno. Hozan Bengîyî da zanayene ke êdî seba kurdan deyîrê neweyî lazim ê û qiseykerdişê xo wina qedîna: “Ma hende çimeyan ra werd ke êdî ziwa bîyê. O semed ra êdî seba kulturê Kurdkî ganî deyîrê neweyî ke bi motîfanê ziwanê Kurdkî yenê xemilnayene, bêrê afirnayene. Komelî rê zî hunerê Kurdkî rê zî no lazim o. Ziwan hende bi qîmet o ke erjo ke merdim dano dayîke ganî bi ziwan bêro peymawitene.”
