Pêvînayîşê Sazîyanê Elewîyan seba vindarnayîşê qetlîamê Elewîyanê Sûrîye dewam kenê. Serekê PSAKD’î Cuma Erçe û Sekreterê ABF’î Ozgur Kaplanî vanê ma do hemverê qetlîman bêveng nêvinderê.
Pêvînayîşê Sazîyanê Elewîyan seba vindarnayîşê qetlîamê Elewîyanê Sûrîye dewam kenê. Serekê Sazîyanê Kultir ê Pîr Sultan Abdalî (PSAKD) Cuma Erçe û Sekreterê Federasyonê Elewî û Bektaşîyan (ABF) Ozgur Kaplan vanê ma do hemverê qetlîman bêveng nêvinderê û na babete de
Sazîyê Elewîyan seba vindarnayîşê qetlîamê Elewîyanê Sûrîye pêvînayîşanê xo partîyanê sîyasî, sersefîran û tewr peyên zî Delegasyonê Tirkîya ê Yewîya Ewrûpa reyde domnenê.
Serekê PSAKD’î Cuma Erçe yî va: “Elewî û Sazîyê Elewîyan Tirkîya de, Rojhelato Mîyanên de û dinya de her tim hemverê zilm, zorî û rejîmanê diktatorîyan vindertî û naye ra dima zî do vinderê. Sûrîye de qetlîamê Elewîyan ser o xeber, resim û vîdeoyî benê vila. Îhtîmalê qetlîamanê hîna girdan zî est o û ma vazenê ke vernîya nînan bigîrê. Seba heşarbiyayîşî ma pêvînayişan virazenê.”
‘Ma di talebê esasî dayê xo ver’
Qetlîamê ke Sûrîye de verba Elewîyan yenê kerdene seba vindarnayîş û heşarkerdişî Erçeyî wina dewam kerd: “Sey sazîyanê Elewîyan ma pêro şûbeyan de panel, sempozyûm, eşkerakerdişê çapemenîyan, reaksîyonê bînî, Mîtîngê Samandaxî, mîtîngo ke ma vernîya Parlamentoyê Ewropa de viraşt û Parlementoyê Birîtanya de eşkerayîye, reaksîyonê ke ma kuçeyanê Ewropa de dayê kerdene û nînan ra vete zî Tirkîya de partîyê ke grubê xo est ê serekê ê grûban de zî pêvinayişî viraştê.
Nê pêvînayîşan de ma di çîyê esasî dayê vêrnîya xo. Nînan ra ê yewîne ma waşt ke heyetê ke seba muşahede şinê Sûrîye, ma zî waşt nê heyetan reyde şêrê. Bi taybetî zî cayê ke Elewî tede ciwiyenê. No waştişê ma heta nika nêame qebulkerdiş. Ê diyîne zî ma wazenê ke korîdorê merdimîye bêro akerdiş ke ma bieşkê hetkarîya înan bikerê. Na babete de xebatê ma dewam kenê.”
‘Her kes gerê vengê xo berz bikero’
Sekreterê ABF’î Ozgur Kaplanî zî va: “Sûrîye de çend şarê sekulerî û demokratî est ê wa paştî bidê Elewîyan ke hedefê HTŞ’î de yê. Na babete de fikarê ma zaf ê. O semedî ra ma nê pêvînayîşan kenê. Tena Elewîyê Tirkîya nê her kes gere hemverê nê zilm û qetlîaman de vengê xo berz bikero.”
Çime: PÎRHA
