Şaredarîya Peyasî bi armancê pawitiş, averberdiş û famkerdişê ziwanê kurdkî ‘Meclîsê Ziwanî’ awan kerd.
Şaredarîya Peyasî bi armancê pawitiş, averberdişê ziwanê kurdkî ‘Meclîsê Ziwanî’ awan kerd. Bernameyê awankerdişî banê Şaredarîya Peyasî ame kerdene û bernameyî ra Hemşaredaranê Peyasî Bêrîvan Gulşen Sîncar û Cengîz Dundar, temsîlkarê DEM Partî yê qezaye, rayber û endamê MED-DER’î, Komeleya Edebeyatkaranê Kurdî, PEN-a Kurd, xeylê nuştox, ziwanzan, endamê Meclîsê Şaredarîye û welatijan beşdar bîyê.
Bernameyê awankerdişî de Hemşaredara Peyasî Bêrîvan Gulşen Sîncar qisey kerd û wina va: “Awankerdişê Meclîsê Ziwanî seba ma sey sozêko pîroz o û ma do sozê xo ra zî wayîr bivejê.”
Metnê beyanatî zî wina yo:
“Meclîsê Ziwanî
ÇAPEMENÎ Û RAYA PÊROYÎ RÊ
Bi çarçeweya prensîbanê îdareyê heremî; xopawitiş, demoktratîk û pawitişê azadîya cenîyan reyde, Şaredarîya Peyasî pêro kar û xebatanê xo de goreyê taybetîya qeza û şarê na qeza rê xizmetê xo bi hawayêkî zafziwanî wazena bîyaro ca.
Seba ke no armanc bêro caardene, kultur û ziwanê şaranê ke mîyanê sînoranê Şaredarîye der ê, hewce yo ke, gere bêrê kifşkerdiş, pawitiş û averberdiş; seba xebatanê mîrasê kulturî piştî bêro dayene; bi pêro ziwanan de kursan bêro akerdene û atolyeyanê nuştiş û wendişî bêrê viraştene û projeyan bêrê amedekerdene. Bi no qeyde, warê kulturî û ziwanî de xizmetanê Şaredarîye bêro ramitene, heqê hemwelatîyan ê ziwanî bêrê verçiman girewtiş ke nê heqî seba merdiman heqê bîngehîn ê û pêro peymananê mîyanneteweyî û huqûqê heqanê merdiman de zî ca girewtê û seba cuwîyayîşê merdiman bi hawayêko bingehin lazim ê. Seba ke nê heqî bêrê pawitiş yan zî bi hawayêkê asênî bêrê xebitnayiş, lazim o ke bi tekîldarîyê ziwan, zarava û fekê înan reyde xebatanê tewir bi tewiran bivirazîyo.
Bi nê semedan, seba ke xizmetê Şaredarîyeya komelkî, kulturî û îdarî bibo dewrêkê hîrayî û şarê qeza bieşkero bi hawayêkê zafziwanî xo biresno îmkananê şaredarîye, heqanê xo yê şaredarîye bişuxulno, hewce bî ke yew merkezêkî û sazgehêkî bivirazîyo.
No sazbîyayîş do bikero ke potansîyelê kulturî û ziwanî yê Şaredarîye zêdêr bêro eşkerakerdiş, seba pêşkêşkerdişê xizmetanê zafziwanî mîyanê yewîneyanê şaredarîye de têkilî û ahengî virazîyo û faîde xebatanê yewbînan ra bêro girewtiş zî hewna lazimîya ci esta. Eynî sazî hem do bi pêşnîyazanê xo pişt bido prosesê kifşkerdişê polîtîkayan û amadekerdişê bernameyan hem zî do bi hawayêkê çalak beşdarê caardişê nê polîtîka û bernameyan bibo.
Bi nê armancî do na sazîye bernameyanê perwerdeyî saz biko, pişt bido averberdişê zafkulturî û zafziwanî. Bi eynî hawayî, seba ke xebatkarê Şaredarîye bieşkero xizmetanê zafziwanî pêşkêş biko zî do kurs û kargehî bêrê viraştene. Eynî sazîye do bikero ke bi sazî û dezgehê ke eynî ware de xebetînê reyde têkilî bêro ronayîş, hemkarî bêro kerdiş û faîde xebatanê zanayîşe yê ziwanî û kulturî yê ke na ware de ameyê kerdiş, bêro girewtiş.
No semed ra û hewcedarîyê ke cor de ameyî musnayîş, ma Meclîsê Ziwanî yê Şaredarîya Peyasî saz kerd. Sey endamê ke na meclîsî de ca gênê, waştişê ma o yo ke goreyê nêhewcedarîyan xebatî bêrê viraştene, rayîr verê nê xebatan bêro akerdiş û seba caardişê nînan armancan hewl bêro dayene.”
