Konseya Taqîbkerdiş û Nirxnayîşî ya ke çarçewaya prosesî de ameya awankerdene, ewro kombîyayîşê xo yo dîyin virazena. Kombîyayîşê verên ê 24ê tebaxe de usul û esasê xebata konseye ameybî dîyarkerdene û awankerdişê 4 binkomîsyonanê ke prosesî ramenê ameybî qerardayene.
Hetkarê Serokkomarî Cevdet Yilmazî vizêrî derheqê kombîyayîşî de vatbî: “Wezîfeyê nê konseye taqîbkerdişê prosesî yo. Ma çar binkonseyî awan kerdî: yew seba prosesê edlî û huqûqî, dîyin seba yewbîyayîş û ahengê sosyalî, hîrêyin seba çimderkerdişê warî û çarin zî seba çekanronayîş û koordînasyonê stratejîkî.”
Kombîyayîşê verên ê konseye 24ê tebaxe de Kullîyeyê Serokkomarîye de bi serekîya Yilmazî ameybî viraştene û nêzdîyê 3,5 saetan dewam kerdbî; Wezîrê Teberî Hakan Fîdan, Wezîrê Zereyî Mustafa Çîftçî, Wezîrê Edaletî Akin Gurlek, Wezîrê Pawitişî Yaşar Guler, Serekê MÎTî Îbrahîm Kalin û Sekreterê Pêroyî yê MGKyî Oktay Memîş beşdar bîbî. Nê kombîyayîşî de awankerdişê 4 binkomîsyonan ameybî qerardayene: Binkomîsyonê Koordînasyonê Karanê Edlî û Huqûqîyan, Binkomîsyonê Çimderî û Tesbîtî, Binkomîsyonê Aheng û Yewbîyayîşê Sosyalî û Binkomîsyonê Bêçekbîyayîş û Koordînasyonê Stratejîkî. Ameybî dîyarkerdene ke Abdullah Ocalan zî Binkomîsyonê Bêçekbîyayîş û Koordînasyonê Stratejîkî de ca gêno û ekîbê konseye Tirkîya, Ewropa û Herêma Federal a Kurdîstanî de xebate rameno.
