Saetanê nêmrojî de rejîmê Îranî reyna bi fuzeyan hêrişê kampê Komala Zehmetkêşanê Kurdîstanî yê Gelîyê Alaney kerd.
Endamê Komîteya Merkezî yê Komala Zehmetkêşanê Kurdîstanî Ehmed Hisên Pena derheqê hêrişê newe yê Îranî ke kampanê partîya înan ê Gelîyê Alaney ser o de, agahîyê neweyî pare kerdî.
Ehmed Hisên Pena derheqê hêrişê Îranî de wina vat: “Saete 13:30î de, Îranî reyna bi fuzeyan hêrişê kampê Komala Zehmetkêşanê Kurdîstanî yê Gelîyê Alane kerd. Heta nika tu agahîyêka resmî derheqê estbîyayîşê zerarê canî de nêameyo dayene. No hêriş zî dewamê hêrişanê fuzeyan û teyaranê bêmerdiman ê Îranî yo ke vera kampanê partîyanê Rojhelatê Kurdîstanî yê Herêma Kurdistanî de yê keno.”
Ehmed Hisênî eşkere kerd ke goreyê doneyanê Komela, destpêkê şerê mabênê Îran û Amerîka ra heta nika, hûmara pêroyî yê fuze û dronanê ke seba hedefgirewtişê kampanê Komela ameyê şuxulnayene, resayê 102 fuze û dronan.
Hewceyê vatene yo ke, tewlê estbîyayîş dîyalogê mabênê Tehran û Washîngtonî seba vindarnayîşê şerî, la rejîmê Îranî her roj û bi hawayêko domdar erdê Herêma Kurdîstanî û bi taybetî partîyanê Kurdan ê Rojhelatê Kurdîstanî keno hedef.
Seba nê hêrişanê Îranî ra, heta nika zêdeyêrê 30 kesan ke tayê înan hemwelatîyê sîvîl ê û beşêko bîn zî pêşmergeyê partîyanê Rojhelatî yê Herêma Kurdîstanî yê, şehîd bîyê.
