Rejîmê Îranî ke netîceyê hêrişanê hemvere şarî de bi hezaran kesî destbend kerdê, bi amancê tersnayîşê komelî û vindarnayîşê serewedaritişan amedekarîya înfazanê komî keno.
Îran de serewedaritişî roja 16. de dewam kenê. Rixmê heme hêriş û tedayanê rejîmê Îranî şewa bîne bi desan şaristan û qezayan de şar kewt kuçeyan û heta nîmeyê şewe bi sloganan waştişê xo îfade kerdê. Rejîm, çend şono kontrolê xo komelî ser o vîndî keno û cehd keno ke bi teda û tehdîdan kontrolê xo awan bikero. Ame zanayîş ke rejîmî heta nika derûdorê 4 hezar kesî destbend kerdê û cehd keno ke bilez înfazan bikero. Goreyê pisporanê ewleyî, rejîm bi nê hewayî wazeno çimanê komelî bitersno û şorişî bifetisno.
Rêxistinanê heqanê merdiman vengdayîşê raya pêroyî yê mîyanneteweyî kerd ke vera tedayanê Îranî bêveng nêmanê. Rêxistinanê heqanê merdiman vat ke ciwano bi nameyê Erfan Soltan ke 9ê çele de amebi girewtiş do bêro dardekerdene. Ame eşkerakerdene ke rejîmî vengda keyeyê ey ke reya peyênê seba 10 deqîqeyan lajê xo bîvînê. Keye û avûkatê keyeyî zî îfade kerd ke eke vengêko xurt nêvejîyo rejîm do Soltanî 14ê çele de darde bikero.
Weşanê ke nêzdîyê rejîmî yê, ê zî xeberanê sey, “Hezar kesî ke ameyê destbendkerdene do bêrê dardekerdene” weşanenê.
