Ame zanayene ke 3 kesê ke bi manayê tewrbîyayîşê çalakîyanê aşma çeleyî bîyê û ameyê girewtene, bi sucdarîya “teror” û “serewedaritişî” Meşhed de ameyê dardekerdiş.
Goreyê Ajansê Xeberan ê Tasnîmî ke nêzî Artêşê Mihafizanê Şorişî yo, Mehdî Resûlî, Mihemed Riza Mîrî û Îbrahîm Dewletabadî bi sucdarîya “Ewlekarîya komelê herimnaya û çalakîyê terorî viraştê”, “Dewletanê dişmenan reyde hemkarî kerda” û “Serewedarnayo” ameyê muhakemekerdene, ewro serê sibayî Hepisxaneyê Vakilabadî de ameyê dardekerdene.
Girewtiş û dardekerdişî zêde bîyê
Yeno vatene ke Îran de girewtiş û dardekerdişî, bi taybetî derheqê protestoyanê zimistanê vîyarte de yê. Goreyê melumatan, dimayê şerê herêmî yê 28ê sibate ke bi hêrîşanê Dewletanê Yewbîyayeyan ê Amerîka (DYE) û Îsraîlî dest pêkerdbî, dardekerdişî hîna zêde bîyê.
Goreyê Rêxistina Efûyî ya Mîyanneteweyî û rêxistinanê bînî û ê heqanûê merdiman, Îran dimayê Çînî welato diyîn o ke tewr zaf cezaya îdamî keno ano ca.
Rayedarê Îranî zî îdîa kenê ke pêlê protestoyanê peyên ke aşma çele de resayo asta tewr berze, destpêk de aştîyane bîyê labelê dima ra ‘bi mudaxeleyanê hêzanê xerîban bîyê serewedaritişan ke ameyê sûrkerdene’. Goreyê eşkerayîyanê fermîyan, nê prosesî de 3 hezar ra zafêr kesî cuya xo ra bîyê.
Dardekerdişî emser zêde bîyê
Goreyê daneyanê rêxistinanê heqanê merdiman, welat de hûmara dardekerdişan resaya asta tewr berze ya serranê peyênan. Goreyê raporê hevpar ê Rêxistina Heqanê Merdiman a Îranî û ‘Pîya Vera Cezaya Dardekerdişî’ (Ensemble contre la peine de mort), serra 2025î de Îran de tewr kêm hezar û 639 kesî ameyê dardekerdiş. Na hûmare, serra 1989î ra heta ewro sey hûmara tewr berze bal ancena xo ser.
Rapor de ame dîyarkerdene ke, goreyê 975 dardekerdişan serra 2024î, dardekerdîşê emserî se ra 68 zêde bîyê.
