Raywanê Rayîrşîyayîşê “Azadî û Çareserîya Demokratîke” resayê verê Meclîsî û veng da va: “Wa Meclîs berpirsîyarîya hewanayîşê tecrîdî, çareserîya problemê Kurd û demokratîkbîyayişê Tirkîya bigîro xo ser.”
Peynîya vengdayîşê roşnvîran, Amed de bi rayberîya Platformê Sazîyanê Demokratîkan bi dirûşmeyê “Azadî û Çareserîya Demokratîke” dest bi rayîrşîyayîşî kerd û raywanî ewro resayê Enqere. Bi beşdarîya Hemserekanê Pêroyî yê DBP’yî Çîgdem Kiliçgun Uçar û Keskîn Bayindir, Hemserekanê Pêroyî yê DEM Partîye Tulay Hatimogullari û Tuncer Bakirhan, Verfeka HDK’yî Meral Daniş Beştaş, wekîlê DEM Partî, temsîlkarê sazgeh û dezgehî verê Berê Çankaya yê Meclîsî de beyanatêk ame dayîş.
Beyanato hempar Hemsereka Pêroyî ya DBP’yî Çîgdem Kiliçgun Uçar wend û vat ke nika Tirkîya de verê îradeyê çareserîye Abdullah Ocalan ameyo girewtiş û wina vat: “Bi tecrîdî Tirkîya huqûq çin kerd û Birêz Ocalan ser o tecrîd nîşan dano ke Hukmatê AKP’yî otorîtebîyayîş esas girewto. Komelan bi berzîya huqûq, edelet û demokrasîye de pîya ciwîyenê, eke îqtîdarêk nê erjan ra fek verdo do no komel meşrûyetê xo vindî bikero. Tecrîd problemê Kurdan hîna bi xorîn keno. Ganî seba averşîyayîşê huqûq û demokrasîye tecrîd bihewanîyo.”
Çîgdem Kiliçgun Uçar dîyar kerd ke wa Meclîs hewanayîşê tecrîdî, çareserîya problemê Kurd û demokratîkbîyayîşê Tirkîya ser o berpirsîyarî bigîro û wina qedêna: “Kesê ke aştî û demokrasî wazenê, ganî verba tecrîdî de vengê xo berz bikê. Ma hewna veng danê, welatêk eke berzîya huqûq û demokrasîye esas gêno, ma veng danê; wa tecrîdo teqez bêro hewanayîş.”
‘Ma Welatêko Sey Welatê Azadîye Awan Bikerê’
Hemserekê DEM Partî yo Pêroyî Tuncer Bakirhanî hêrîşê ke Sûrîye de bîyê, înan ser o qisey kerd û va do şarê Tirkîya hetê demokratîkkerdişî de vindero. Bakirhanî derheqê hêrîşanê Sûrîye de va ke di rojnamegerî Nazim Daştan û Cîhan Bilginî ke bi kamera û fotorafan raştîye vetêne meydan, ameyî kiştene. Ey têkilîya prosesê demokratîkî ke Îstanbul ra dest pêkerda zî ard ziwan û va ke sîyasetkarî, rêxistinê karkeran û keyeyê girewtîyan pîya Anqara de ameyî têhet. Bakirhanî va: “Ez bawer kena ke şarê Tirkîya do nê welatî de hetê têkoşînê viraştişê welatêko demokratîk û azad de ca bigîro.”
