CHP’yî raporê xo yê qeyyûman vila kerd. Goreyê raporî Hukmatî 154 rey qeyyûm amo eştene û tewr zaf Amed rê ameyo eştiş.
Goreyê raporê CHP’yî ke qeyyûman ser o ameyo hazirkerdiş, badê KHK’ya 674. ke 8 serrî yo dewam kena, Hukmatî 154 rey qeyyûm eşto îdareyê şaredarîyan ser o.
Raporî de dîyar bîyo ke 2016-2024 de nê tayînkerdişê qeyyûman tesîrê 11 mîlyon 202 hezar û 496 weçînoxan kerdo. Goreyê raporî Amed bi 26 qeyyûman yewin o û dima bi 23 qeyyûman Wan est o.
31ê Adare ra ver 49 şaredarî binê îdareyê qeyyûman de bîy. Nînan ra 9 hebî 31ê Adare de AKP û MHP’yî girewtî. Qeyyûmo peyên ke Esenyurt de ame dayene, meclîsê şaredarîye zî betal kerdo.
Raporî de weçînayîşê 31ê Adare ra dima zî çend pêşnîyazî est ê:
– Hukmat ganî vengê sindoqan rê wayîr bivejîyo
– Qeyyûm ganî fek karî ra verdo û teslîmê meclîsî biko
– Qanûno ke 10 partîyê parlementoyî pêşnîyaz kenê, ganî bêro qebulkerdiş
– Qanûnê Şaredarîye de maddeyê qeyyûmî ganî bêrê wedarnayene
– Şaredarê ke hema hukim nêgirewto ganî agêrê karê xo
