Cagirê Serekwezîrê Hukmatê Demkî yê Herêma Kurdîstanî Qubad Talebanî waşt ke krîzê Herêma Kurdîstanî biqedîyê û wina vat: “Çîyo ke Parlamentoyê Kurdîstanî de qewimîya, cayê şermî bi, labelê no peynîya her çîyî nîyo; nê krîzî eşkenê bêrê çareserkerdene û ganî nê krîzî biqedîyê.”
Cagirê Serekwezîrê Hukmatê Demkî yê Herêma Kurdîstanî Qubad Talebanî, Korbenda Stratejîke ya Silêmanîye de ke di rojî yo bi tewrbîyayîşê serkêş û kesayetanê sîyasî, dîplomat, ekonomîk û eskerî yê Îraq û dinya dewam kena, serê krîzê mabênê PDK-YNK’yî de qisey kerd û bale ante serê sebeb û çareserkerdişê krîzî ser o.
Derheqê rewşa Herêma Kurdîstanî de Qubad Talebanî nê çîyî vatî: “Çîyo ke parlamentoyo de qewimîya cayê şermî bi û tu welatêko demokratîk ê dinya de çîyo nîyayên nêqewimîyayo. Labelê no krîzo nikayên ê Herêma Kurdîstanî çîyo wina nîyo ke nêro çareserkerdene û ganî biqedîyo.”
Qubad Talebanî bale ante serê nakokîyanê mabênê PDK-YNK’yî û wina vat: “Her çiqas ke Washîngton de pêkerdişo stratejîk ame îmzakerdene û a roje ra heta nika karê hemparî ame kerdene zî, nakokîyî bin ra nêameyî çareserkerdene. No semed ra nakokîyî heta ewro bi nê qaydeyî ameyî; karê hemparî zî sewîyeya kesan de mend, nêkewt sewîyeya dezgehan.”
Goreyê Qubad Talebanî, meseleyanê înan ê PDKyî reyde o yewin û mîyanê hukmatî de no yo ke îqtîdar destê çend kesan de ameyo komkerdene û seba herêmanê bînan nêameyo parekerdene.










