Pîranşar û Serdeştê Rojhelatê Kurdîstanî de mabênê hêzanê Rojhelat û artêşa Pasdaranê Îranî de şer qewimîya. Ame eşkerakerdene ke pêkewtişan de 5 pêşmergeyî cuya xo ra bîyî.
Goreyê agahîyan, şewa verêne qezayanê Pîranşar û Serdeştê Rojhelatê Kurdîstanî de mabênê hêzanê Rojhelatê Kurdistan û artêşa Pasdaranê Îranî de şer qewımîya. Ame eşkerakerdene ke şer nêzdîyê dewa Musalanî ya Serdeştî û qezaya Berê Mêrganî ya Pîranşarî de qewimîya.
Heta nika tu hetan derheqê hedîse de tu eşkerayîyêka fermî nêdaya. La goreyê ajansê Rojnewsî, şerê dorûverê Qizqapanî ya Pîranşarî de 5 pêşmergeyî cuya xo ra bîyî. Ame eşkerakerdene ke nameyê pêşmergeyanê ke cuya xo ra bîyî wina yê: Ebdulla Hacî Ebdulla, Karo Hormoziyarî, Tuwana Osmanî, Ferdîn Çengîzî û Mihemed Gergulî.
Goreyê agahîyan her 5 pêşmergeyê ke cuya xo ra bîyê partîyanê Rojhelatê Kurdîstanî ra yê, la heta nika tu partî eşkerayîya fermî nêdaya. Serê netîceyê şerê Musalanê Serdeştî de heta nika tu agahî dest nêkewtê.
