Serê erdlerzê 6ê sibate ra di serrî vîyartê la hema zî şar konteyneran de ciwîyeno. Cinîyê ke mehkumê konteyneran bîyê dîyar kerd ke seba ke konteynerî teng ê zehmetîyan ancenê, her cayî de mereyî gêrenê û tersan ra nêeşkenê rakewê.
Qezaya Pazarcixî ya Mereşî ke 582 awanî rijyayî o wext serekkomarî dîyar kerd ke do serrêkî de awanî bêrê teslîmkerdiş. La no soz bica nêame. Wextê erdlerzî de yê ke kîra de bîyê, TOKÎ’yan de nêbîyê nêbîyê wayîrê heqî hema zî mehkumê konteyneran ê.
Cinîyê Pazarcixî derheqê erdlerzî de Ajansa JINNEWS’î rê qisey kerd û vat: “Îqtîdar sozê ke dayê bica nêardê.”
‘Ma hewl danê biciwîyê’
Cinîya bi nameyê Server Kocaman (47) wina vat: “Ez hewl dana 4 tutanê xo bida wendiş. Qaso ke destê ma ra yeno ma kenê. Ez nêeşkena keyeyêk kîra bikera. Nika vayîya keyeyan tewr tay 10 hezar TL ya û demê fatûreyan de werd û şimitiş zî zêde beno. Ganî tewr tay 40-50 hezar meaş cêbê ma de bibo. Ez erdlerzî ra ver kîra de bîya. Coka tu heqê mi çin o. Ma her çî vînî kerd. Nika ma hewl danê ke konteyneranê şenikan de biciwîyê.”
‘Ma tersan ra ranêkewenê’
Elîf Yaşkiran (65) derheqê çîyanê ke konteyneran de ciwîyenê qal kerd û wina vat: “Ma rezîl û riswa bîyê. Ma tîya de perîşan benê. Kîra vay a. Ma nêeşkenê debara xo bikerê. Ez ewnîyena di tornanê xo ra. Di lajê mi est ê. Aşme de 14 hezar keweno ma dest. Yew lajê mi semedê deynan întîxar kerd. Mereyî her cayî de gêrenê. Ma tersan ra nêeşkenê rakewê.”
‘Ma zor û zehmetîyan ancenê’
Fatma Ede (42) zî wina vat: “Verê ma kîra de bîyê. Badê erdlerzî zî heq nêda ma. Ma ardî nê konteyneran û ma bêwayîr verdayî. Ez nêweşa epîlepsî ya. Meaşê teqawîtî yê pîyê mi tena est o ke ma pê debara xo bikerê. Ma hîrê kesî debara xo bi nê kenê la zehmet o. Ma tîya zehmetîyanê pîlan ancenê.”
‘Hetkarîya kîra birnayî’
Zeynep Ede (67) zî dîyar kerd ke di serrî yo konteyneran de ciwîyenê û vat: “Kênaya mi nêweşa epîlepsî ya. Konteynerî teng ê. Ma nêeşkenê tîya de biciwîyê. Kes hetkarî nêdano ma. Ma terkê tîya kerdê. Îmkanê ma yê ke ma şêrê kîra çin ê. Verê hetkarîya kîra dayîne la nika ê zî birnayî.”
4 hezar qîmê çi keno?
Melek Yurdakul (80) zî dîyar kerd ke erdlerz de pêro keyeyê xo vîndî kerdo û bi tena sereyê xo konteynere de ciwîyena. Melek Yurdakul wina vat: “Ne gedeyê min mendê, ne way û ne zî birayê mi. Cîranî hetkarî danê mi. Dewlete tena 4 hezar lîra dana mi. Dermanê mi est ê, werdê mi est o. No pere do qîmê çî bikero?”
