Pêkewtişî de ke Qezaya Pawe ya Rojhelatê Kurdîstanî de vejîya 2 Muhafizê Şorişî yê Îranî ameyî kiştene û 2 hebî zî bi giranî birîndar bîyî.
Muhafizanê Şorişî yê Îranî nê rojanê peyênan de dormeyê şaristanê Bane de bombarduman kerdbi û Mahabad de zî operasyonêko leşkerî dabi destpêkerdene. Vizêr şewe zî herêma Hewremanî ya qezaya Pawe ya Rojhelatê Kurdîstanî de pêkewtişêk qewimîya.
Goreyê zanayîşanê ke herême ra ameyî girewtene, mabênê hêzanê Îranî û grûbeka çekdare de pêkewtişêk qewimîya û heta saetanê erey ê şewe dewam kerd.
Xeberanê Medyaya Îranî de ame dîyarkerdiş ke peynîya nê pêkewtişî de, 2 muhafizê şorişî yê bi nameyê Xalid Xaldînya û Burhan Qirîsanî ameyî kiştene, 2 pasdarê bînî zî bi giran birîndar bîyî.
Derheqê hedîse de hema eşkerayîyêka fermî nêameya dayene la grûbeka bi nameyê Horî Hîwa torranê medyaya dîjîtale de bi eşkerayîyêk hêrişê vera Muhafizanê Şorişî girewt xo ser.
