DÊRSIM – Festîvala Kultur û Xoza ya Munzurî ya 24. roja 4. de bi panelan dewam kena. Roniştişê diyin de “Tirkîya de Prosesê Sîyasî, Rojhelatê Mîyanên û Hegemonyaya Emperyalîst” ser o qiseykerdişî ameyê kerdiş.
Festîvala Kultur û Xoza ya Munzurî ya 24. roja 4. de bi sloganê ‘Seba Vîr û Cuya Azade; Ma xoza, zîwan, kultur û bawerîya xo rê wayîr vejîyenê’ merkezê Dêrsîmî de bi panelan dewam kena. Roniştişê yewin de Panelê “Ekolojî” virazîya, dima ra roniştişo dîyin “Tirkîya de Prosesê Sîyasî, Rojhelato Mîyanên û Hegemonyaya Emperyalîst” virazîya. Moderatorîya panelî Ozkan Tacar kerd; Hetkarê Hemserekanê Pêroyî yê DEM Partî yê Mahfuz Guleryuz, Temsîlkarê SMF’yî Zîya Cebecî, Parlamenterê Partîya Newîye Gokhan Gunaydinî sey qiseykerdox beşdar bîyî.
‘Dewlete tekoşînê kurdanê 100 serrî dî’
Hetkarê Hemserekanê Pêroyî yê DEM Partî yê Mahfuz Guleryuzî vat: “Qanûnê 1924î nê welatî de nêame vurîyayîş. O semed ra, wextêk ma nê prosesê genê dest, ma vajê Bahçelî bîyo şorişgir, Erdogan ameyo îman û kurdan de bîyo bira ma konê şaşî. Tirkîya 100 serre seba ke no mesele êro qiseykerdiş xo tarumar kerdo. Dewlete 2015î ra pey tekoşînê kurdan ê 100 serrên dî. Kurd û birakene yî Şarê Tirkîya û dinya de pîya tekoşîn da.”e
Mahfuz Guleryuzî vat: “Seba ke prosesê aşîtî bireso encam ma tekoşînê xo danê. Ma sey DEM Partî û Şar Tirkîyaya demokratîk wazenê. Ma tekoşînê xo ra fek veranêda. Têkoşînî ewroyî zî têkoşîn o. Eke no hêzê ma est o ma eşkenê AKP û MHP’yî rê game bidê eştiş.”
‘Proses est o la polîtîkayê qeyumî hema zî dewam kenê’
Dima ra parlamenterê Partîya Newîye Gokhan Gunaydinî qisey kerd û vat: “Proses est o la polîtîkayê qeyumî hema zî dewam kenê.”
Temsîlkarê SMF’yî Zîya Cebecîyî zî vat: “Çîyo ke dewlete tira tersena, komel bi xo yo. Îqtîdar dewlete sey şîrket şuxulneno. Ê bi xo yew qanûn vejenê û o qanûn binpay kenê. Ma wayîrê îradeyê mîlî vejîyênê.”
Panel bi persan û cewaban qedîya.
