Eyaletê Hayber Pahtunhva yê vakurê rojavayê Pakistanî de di hêrişê bibomba virazîyayê û hêzanê asayîşî reyde pêkewtiş vejîya. Hêriş û teqayene de tewr tay 14 kesî cuya xo ra bîyî û 27 hewt kesî zî birîndar bîyî.
Eyaletê Hayber Pahtunhva de bi bombayan hêrişê hêzanê asayîşî ame kerdene. Badê teqayîşan mabênê grûbêka çekdare û hêzanê asayîşî yê Pakistanî de pêkewtiş vejîya. Netîceya şerî de tewr tay 14 kesî cuya xo ra bîyî, 27 kesan ra zêdeyêr birîndar bîyî. Mîyanê merdeyan de 11 wezîfedarê asayîşî û 3 sivîlî zî est ê. Sewbîna zî 3 kesê çekdarî cuya xo ra bîyî.
Wesayîto pirî teqebar ame teqnayene
Goreyê rayedaran hêriş verê cû qezaya Bajaur de virazîya. Wesayîtêke teqabar barkerde gina dêsê medreseyêk ro û înfîlak bî. Teqayene de 8 polîs û endamê Yewîneyê Sînorî cuya xo ra bîyî. 10 wezîfedarê asayîşî birîndar bîyî. Tesîrdarîya teqayîşî ra banê tayê keyeyanê dorûverî rijîyayê û gedeyêk cuya xo ra bî. Rayedaran dîyar kerd ke beno ke merg zêde bibo. Herişêko cîya zî şaristanê Bannu de qewmîya. Nêzdîyê nuqtaya polîsan de teqayîş qewmîya. Teqayene de 2 sivîlî merdê, 17 kesî birindar bîyê.
Verê cu zî çalakî virazîyaybî
Qezaya Shangla de zî mabênê hêzanê asayîşî û çekdaran de şer qewimîya, 3 polîs û 3 çekdarî cuya xo ra bîyî. Polîsanê eyaletî eşkera kerd kesê ke ameyê kiştene, verê tewrê hêrişanê vera welatijanê Çînî bîyê. Çînî serranê peyênan de bi mîlyaran dolar Pakistan de sermayegozarî kerda, na proje ge-ge bena hedefê grûbanê çekdaran. Adara 2025î de semedê hêrişêkê xokiştişî de 5 muhendisî û şoforo Çînij ke înşaatê bendawe de xebitîyayêne, cuya xo ra bîyî.
Heta nika tu grûbêk berpirsiyarîya çalakî nêgirewta xo ser û hetê sazgehê fermî yê Pakîstanî ra zî tu eşkerayî nêameya dayene.
