Eşkerayîya netîce ya Komxebata Sînemaya Kurdkî de ame îfadekerdene ke “Însîyatîfê Sînemakran ê Kurdan” ameyo awankerdene. Eşkerayî de vajîya “Rêxistinbîyayîşêko xurt lazim o ke demokratîkbîyayîşî bipawo.”
Eşkerayîya netîce ya Komxebata Sînemaya Kurdî yê ke 4-5ê temmuze de Amed de viraşt, ame eşkerakerdene.
Eşkerayî de ame îfadekerdene ke komxebate bi amancê ke rewşa sînemaya kurdkî bêro erjnayene 4-5ê temmuze 2026î de viraşt û rewşa sînemaya kurdkî zaf hetan ra ame nirxnayene. Ame destnîşankerdene ke munaqeşeyê komxebate de vejîya meydan ke sînemaya kurdkî tena bi viraştişê fîlman sînordar nîyo; warêko zafhetî yo ke gere ziwan, hafiza, estetîk, dezgehkîbîyayîş, perwerde, berardiş, vilakerdiş, seypêyîya cinsê komelkî û prensîbanê etîkî reyde pîya bêro destgirewtene.
Ame destnîşankerdene ke sînemaya kurdkî wayîrê potansîyelêko xurt ê berdarî yo, la çinbîyayîşê rêxistinbîyayîşêko hempar, qutbîyayîşê têkilîya mabênê sînemakaran, kêmîya mekanîzmayanê berardişî yê domdaran, îmkanê sînordaran ê perwerdeyî, problemê fînansmanî û çinbîyayîşê arşîvêko hempar sebebê bingeyin ê ke averşîyayîşê nê potansîyelî de rayîr gênê. Destnîşan bî ke problemo bingeyin kêmîya yewîye û dezgehkîbîyayîşî yo û hewcedarîya tewr lezabeze zî pêserbîyayîş û rêxistinbîyayîşê sînemakaran ê kurdan o.
Eşkerayî de babetê ke komxebate de vejîyayî meydan, wina rêz bîyî: pênaseyê sînemaya kurdkî, ziwan û rewşa ci ya estetîke; hewcedarîya dezgehkîbîyayîş û awanîyêka hempare; berardiş, fînansman û prosesê viraştişê fîlman; îmkanê perwerdeyî; vilakerdiş, nawitiş û beşdarîya temaşekaran; arşîvkerdiş û awankerdişê vîrê sînemaya kurdkî; teknolojîyo dîjîtal; û seypêyîya cinsê komelkî û prensîbê etîkî.
Derheqê babetan de ke ser o pê bî, eşkerayî de ame vatene ke ameyoxê sînemaya kurdkî bi cehdanê ferdî heta cayêk şino, la seba domdarî û xurtbîyayîşê xebatanê sînema rêxistinbîyayîşêko xurt lazim o. Bi nê hewayî, seba xebatanê sey perwerde, fon, vilakerdiş, arşîvkerdiş, heqê telîfî û teknolojîyanê neweyan qerarê awankerdişê komîsyonan ame girewtene. Sey netîceya tewr muhîme ya komxebate, seba ke nê warî de kordînasyon bêro temînkerdene, Însîyatîfê Sînemakaran ê Kurdan ame awankerdene û heyetê ci yo îcrayî bi reydayîşê beşdaran ame tesbîtkerdene.
