Komîserê Berz ê Heqanê Merdiman ê NY’yî Volker Turkî da zanayene ke tedayê dewleta Îranî hîna giran bîyê. Turkî 29ê nîsana 2026îde eşkerayîyêk daye û vat ke aşmanê peyênan de dardekerdişî, destbendkerdişê girseyî, şertê giran ê zindanan, destserronayîşê mal û milkan û qutbîyayîşê înternetî krîzê heqanê merdiman ê Îranî hîna xorîn kerdê.
Turkî veng da meqamanê Îranî ke dardekerdişî bilez bêrê vindarnayene, cezaya mergî bêra betalkerdene, heqê muhakemekerdişî yo adîlane bêro garantîkerdene û kesê ke bi keyfî ameyê girewtene, bêrê veradayene.
Goreyê NY’yî, nê di aşmanê peyênan de ke hêrişê Îsraîl û DYA yê vera Îranî dest pêkerdê, tede tewr kêmî 21 kesî ameyê dardekerdene. Nînan ra 9 kesî bi manayê tewrbîyayîşê protestoyanê çeleyê 2026î, 10 kesî bi îdîaya endamtîya rêxistinanê muxalîfan û 2 kesî zî bi sucdarîya ajantîye ameyê dardekerdene.
Eşkerayîya NY’yî de ame vatene ke pênaseyê ‘sucê asayîşî yê neteweyî’ Îran de zaf hîra yo. Nê semedî ra domanî zî tede zaf kesî bi nê tehdîtê cezaya dardekerdişî reyde rî bi rî manenê.
Goreyê daneyanê Neteweyanê Yewbîyayeyan, 28ê sibate ra heta nika Îran de zafêrê 4 hezar kesî bi sucdarîya asayîşê neteweyî ameyê destbendkerdene. NY’yî dîyar kerd ke yew qismê nê kesan bi zorê ameyê vîndîkerdene, înan rê îşkence ameyo kerdene yan zî rastê muameleyanê teberê merdimîye ameyê.
Neteweyanê Yewbîyayeyan eşkera kerd ke nê tedayî tewr zaf vera Bahayîyan, Zerduştîyan, Kurdan û Belûcan ameyê kerdene.
