Muzakereyanê DYA û Îranî de eşkerayîyê eksê yewbînan ameyê dayene; Rayberîyê Washîngtonî qalê averşîyayîşêko sînordar kerd. Tehranî zî vat nakokîyê bingeyinî dewam kenê.
Muzekkereyê adirbestê mabenê Dewletanê Yewbîyayeyan ê Amerîka (DYA) û Îranî de averşîyayîş çin o. Rayberîyê Washîngtonî qalê averşîyayîşêko sînordar kerd. Tehran zî vat nakokîyê bingeyinî dewam kenê.
Astengîyê Neqebê Hurmuzî dewam keno
Wezîrê Karanê Teberî yê DYA’yî Marco Rubîo, kombîyayîşê NATO’yî yê Swêd de qisey kerd û vat: “Îranî reyde temasî tayê sernuşteyan de averşîyayîş virazîyayo, la hema zî probleme cidî nêameyê çareserkerdene.” Marco Rubîo dîyar kerd ke taybetî Neqebê Hurmuzî û waştişê xercî yê Îranî seba şîyayîş û ameyîşî keştîyan astengîya bingeyinî yê kombîyayîşan o. Sewbîna zî wezîfedarê DYA’yî îfade kerd ke bîyayîşê krîzêke de, planêk yê mîyannetewî yo alternatif zî yeno hedrekerdene.
Îran: Cîyabîyayîşê fıkran dewam keno
Eynî roje de Wezaretê Karanê Teberî yê Îranî Abbas Arakçî zî eşkerayîye da û dîyar kerd ke pêvînayîşê DYA’yî reyde cîyabîyayîşê xorîn ê ewnîyayîşan dewam kenê. Rayberîya Tehranî bi hawayêko qetî kerd ke ey do waştişanê Washîngtonî qebûl nêkerê û ganî menfîetê ewleyî û ekonomî yê Îranî pêro bêrê garantîkerdene. Hetê Îranî waştişê hewanayena ambargoyan û kêmkerdişê hêzê leşkerî yê DYA’yî yê herême kerd. Sewbîna çapemenîya Îranî zî eşkera kerd ke muzekkereyê derheqê heqê zengînkerdişê uranyumî bi qerarê Serekê Dînî yê Îranî Mucteba Hamaneyî ame vindarnayene û do nê ser o muzekere nêkerê.
Trump opsîyonê leşkerî ser o nîqaş keno
Serekê DYA’yî Donald Trump zî kombîyayîşê ewleyî yê Qesra Sipî de babeta Îranî ser o nîqaş kerd. Goreyê xeberanê çapemenîyê DYA’yî, Trump dîyar kerdo ke eke muzekkereyan ra netîce nêvejîyo, o eşkeno reyna opsîyonê leşkerî bierjno. Ame eşkerakerdene ke Cagirê Serekê JD Vance, Wezîrê Pawitena Pete Hegseth û Dîrektorê CIA’yî John Ratcliffe zî beşdarê kombîyayîşî bîyî.
Hewildayîşê mabençîyîye
Ame eşkerakerdene ke hewildayîşê mabençîyîyê Pakîstan û Qatarî dewam kenê. Ame dîyarkerdene ke Erkanê Pêroyî yê Pakîstanî Asim Munîr Tehran de pêvînayîşî kerdê. Seba adirbestî formulêko newe yê mabenê her di hetan ser o xebitênê. La goreyê eşkerayîyê ke yenê dayene her di hetî zî pêkerdişî ra dûrî yê.
