Goristanê Sîsê ya ke mîyanê sînorê Licê de ra hîna henî weşanite vindertîya. Keyeyê ke nêzdîyê xo nê goristanî de est ê wazenê ke mezelanê xo newe ra virazê û nameyê înan bidê ser.
Goristanê Sîsê “Şehîdgehê Şehîd Amed û Şehîd Hevîdar”a ke girêdayîyê Qezaya Amedî Licêye ya 2015î ra dima hetê dewlete ra cayê lejkerî û herêma ewlehîye amê pênasekerdene. Verî cikewtena kesan qedexe bîye û kes nêeşkîya şiro serê mezelanê xo. Aşma Adare û Nîsane de zî mezelê Goristanê Sîsê 2015î ra heta 2019 yew bi yew ameyî şiknayene.
Goristanê Sîsê de 241 mezelê gêrîlayanê ke mîyanê serran de cuya xo da est ê û pêroyê nê mezelan ameyê şiknayene miyanê nê mezelan de yew mezele payra nêmenda. Wexto ke kemerê serê sarê mezelan şikitê bi zanayene kemerê nuşteyî parçe kerdê û vila kerdê ke cayê mezelan nêro naskerdene.
Goristanê Sîsê serra 2013î de amebî viraştene. A serre ra dima zafêrî zî roşanan de şarê kurdî her cayê welatî ra ameyne serdayîna mezelanê şehîdanê xo. 2015 ra nahetêrîyo dewlete nêverdana kes şoro serê mezelanê xo û an zî mezelanê xo virazo yew name bido ser.
Nêvirdanê ma mezelanê xo virazime
Keyeyê ke nêzdîyê xo Goristanê Sîsê de est ê wazenê ke mezelanê xo newe ra virazê û nameyê înan bidê ser. Vanê “Hetê ra qalê aştîye û wayûbirayî kenê, hetê ra zî nêvirdanê ma şime serê mezelanê xo. Nêvirdanê ma mezelanê xo virazime. Eke aştîye û wayûbirayî yena waştene o wext verî rêzdarîye nîşanê merdanê ma bikerê. Destê xo serê mezelanê ma ra ravaznê.”
