Parlamenterê Parlamentoyê Ewropa Mimmo Lucanoyî waşt ke Rayberê Şarê Kurdî Abdullah Ocalan azad bibo û sey aktoranê serekeyan ra yew tewrê nê prosesî bibo.
Vengdayîşê seba azadîya fîzîkî ya Rayberê Şarê Kurdî Abdullah Ocalanî roj bi roje zêde beno; bi taybetî sîyasetmedarê Ewropa û Afrîka, roşnvîr û akademîsyenanê ke xelata Nobelî girewta, venga hukmatê Tirkîya danê ke berê Îmralîyî akero. Parlamentero îtalyan Domenico “Mimmo” Lucano zî nê vengdayoxan ra yew o; o 30 serrî ra ver kurdan reyde ameyo têkilî ronayo û wexto ke Rayber Apo şi Roma, Serekê Şaredarîya bajarokê Riaceyî bî. Lucano têkilîya xo ya kurdan reyde bi vateyê “Ez bi saya kurdan bîya serekê şaredarîye” ano ziwan.
Lucanoyî muxabîrê ANFyî Serkan Demîrelî rê vat ke rojêk keştîyêk bi penaberanê kurdan ê Tirkîya, Iraq, Îran û Sûrîye resaye qeraxê Riaceyî û no serebûd bî nuqtaya vurîyayîşî ya cuya ey: “Ez aktîvîstêko sîyasî bîya û destpêk ra amancê şarê kurdan qebul kerdbî. Nê merdimî 2 serrî bajarokê min ê qijî de mendî; ma keyeyê vengî dayî înan û înan reyde têkoşînê azadîye û waştişê komelkî û sîyasî yê şarê kurdan pare kerdî. Ez bîya serekê şaredarîye; tîya de para raştîya şarêkê zaf girdî est a ke kesî estbîyayîşê înan nêzanayêne.”
Lucanoyî derheqê ameyîşê Ocalanî yê Îtalya yê 1998î de qerarê sîyasî rexne kerdî: “Wexto ke Ocalan ame Îtalya, dima tayê pêkerdişê sîyasî ameyî kerdene; raşt o ke Ocalan ame xapênayene û dima Kenya de ame tepiştene. Goreyê mi o wext berpirsîyarîya sîyasetê Îtalya zî est bîye. Ocalanî bi ê şertan û serranê vîyarteyan reyde zî têkilîya xo ya bi têkoşînê azadîya şarê kurdan reyde dewam kerde û qet dest têkoşînê haştîye ra nêverda. Ez zî ê merdiman ra yew a ke nê amancî pare kenê.”
Lucanoyî Prosesê Haştî û Komelê Demokratîkî erjna û vat ke şertê ke Rayber Apo tede yeno tepiştene û rolê ey ê prosesî yewbînan ra nêgirênê: “Wexto ke Ocalan hepisxane de bo, merdim nêeşkeno behsê dîyalogê haştîye bikero; halbukî nê munaqeşeyê Tirkîya reyde de ganî o aktoranê serekeyan ra yew bo.” Ey têkoşînê Rayber Apoyî bi Nelson Mandelayî reyde muqayese kerd: “Ocalan bêsûc o, tu çî nêkerdo û seba şarê xo têkoşîn keno; sey Nelson Mandela nimûneyêko bêhempa yo. Ez bi grûba xo ya sîyasî reyde amade ya ke asta xo ya parlamenterîye de seba azadîya Ocalanî kurdan reyde têkoşîn bikera.”
