Netîceyê tehqîqatê yê Êlihî de, rastîyê wehşîyî vejîyayî meydan. Dosyaya dozgerîya ke 5 hezar rîpelan ra pê yena de aseno ke merkez de vera nêweşan îşkence, tecawiz û muameleyê teberê merdimîye ameyê kerdene.
Êlih de Merkezê Miqatxaneyî yê Taybet ê Şîfa de vera nêweşan û astengdaran wehşet û îşkenceyo ke ameyo kerdene, bi rojan o rojev de yo. Goreyê xebera Ozgur Polîtîkayî, Merkezê Miqatxaneyî yê Taybet ê Şîfa de bi vejîyayîşê belgeyan wehşet û asta îşkenceyê tîya de ameyo kerdene îfşa bî. Vejîya meydan ke yew şebekeya ke 140 kesî ra vêşêrî, rayedaranê dezgeyanê resmîyan pîya zulm û zordarîye kerda, nêweşan rê caardişê teberê merdimîye kerdê.
Belgeyê wehşetî meydan de yê
Tehqîqato ke bi gerreyê karkeranê verênan dest pê kerdbî, eyan kerd ke nêweşî bi qaydeyo sîstematîk rastê wehşetî ameyê. Dosyaya ke bi dîmenan, resman û nuşteyanê mabênê karkeran de ameya tesdîqkerdene, nê wehşetî ameyî tespîtkerdene:
Îşkence: Ganê nêweşan ser de cixare ameya vêşnayene, awa girîyayî ser de ameya kerdene û heta ke leşê înan sîya biba pirodayane.
Muameleyo xirab: Nêweşî mecbur ameyê veradayene ke awa kanalîzasyonî bişimê û pîsîyî biwerê.
Cinsî: Nêweşê ke aqilê înan astengdar o rastê tecawizî ameyê û seba ke nê fehm nêbê, dîmenê kamerayan ameyê esteritene.
Rantê ekonomî: Bi raya reçeteyanê sexteyan û werdê ke nêyenê dayene, dewlete ra pere ameyo girewtene.
Şebekeya mîyanê sazgeh û dezgeyan de
Ameyo tespîtkerdene ke merkez de yew şebekeya 140 kesî ra zêdeyêr esta. Nê şebekeyî de karkerê weşîye, îdarekarê merkezî û tayê rayedarê Mudirîya Keye û Polîtîkayanê Komelî zî estê. Yeno vatene ke seba nê têkilîyan, merkez demêko derg tehqîqatan ra ameyo pawitene.
ÎHD: Berpirsîyarî tena ya karkeran nîya
Serekê Şubeya Êlihî yê ÎHD’yî Ahmet Şîrayî dîyar kerd ke na rewşe tena bi merkezî ra sînorkerde nîya û vat: “Eke yew sazgehê ke bi serran o xebitîyena, ewro bi nê îdîayan kewena rojev, ganî mekanîzmayê teftîşî zî bêrê muhakemekerdene. Kesê ke no wehşet dîyo û vengê xo nêkerdo, şirîkê nê sucî yê.” Çiqas ke qerarê nimitîye yê serê dosyaye ameyo wedaritene zî, “qedexeyê weşanî” yê serê hedîse hîna zî dewam keno. Tehqîqatê serê merkezî bi qaydeyo hîra dewam keno.
