Merdimê Vîndîbîyayan û Şûbeyanê ÎHD’yî yê Amed, Êlih û Colemêrgî faîlê Çetîn Abayay, aqûbeta Mûsa Kolûman û 12 welatijanê qezaya Rûbarok ê Colemêrgî ameye vîndîkerdene persayê
Merdimê Vîndîbîyayan û Şûbeyanê ÎHD’yî yê Amed, Êlih û Colemêrgî çalakîya xo ya ‘Wa vîndîkerdeyî bêrê vînayene faîlî bêrê muhakemekerdene’ domna. Çalakîya na hewteyî de Amed de aqûbeta Mûsa Kolûman, Êlih de faîlê rojnameger Çetîn Abayay û Colemêrg de zî aqûbeta 12 welatijan dewa Bêsusin ya girêdaya qezaya Rûbarok ya Colemêrgî ke 24ê temmuza 1994î de hetê cendirmeyan ra amebî destbendkerdene û dima ra ameyê vîndîkerdene, ameyê persayene.
Amed
Merdimê Vîndîbîyayan û Şubeyê Komeleya Heqanê Merdiman (ÎHD) ya Amedî çalakîya xo ya ‘Wa vîndîkerdeyî bêrê vînayene faîlî bêrê muhakemekerdene’ hewteyo 911. de verê Abîdeyê Heqê Cuye yê Parka Koşuyolu ya Rezanê ya Amedî de viraşte. Hemşaredara Amedî ya Şaristanê Girdî Serra Bûcak, Merdimê Vîndîbîyayan, Endam û rayberê ÎHD’yî, temsîlkarê sazgehanê sîvîl û xeylê kesî tewrê çalakî bîyî. Çalakî de fotografê vîndîbîyayan û Mûsa Kolûman ameyê girewtene. Hewteyê 911. de aqûbeta Mûsa Kolûman ê ke 23ê temmuza 1997î de Bismil de amebî destbendkerdene û dima ra zî tu agahî nêameya girewtene ame pers kerdene .
Destpêkê çalakî de hemsereka ÎHD’yî Sûzan Mehmetoglu Aksoy qiseykerd.
Çi heyf ke tu rayedaran cewab nêda vengê dayîkan’
Sûzan Mehmetoglû Aksoy dîyar kerd ke bi serran o ey têkoşînê xo dewam kenê û seba vengê xo biresnê rayedaran, nê meydanî de çalakîya xo virazenê û wina vat: “Çi heyf ke tu rayedar û tu îqtîdar cewabêk nêdano vengê dayîkan û keyeyan. Waştişo tewr gird ê keyeyan o yo ke; mezelê gedeyanê înan, merdimanê înan bibo û şorê serê nê mezelan. Ma sey pawitoxê heqan reyna wazenê vengê xo bidê hesnayîş. Vengê keyeyan, dayîkan bieşnawê û waştişê înan bi ca bîyarê.”
Raybera ÎHD’yî Berfîn Elçî hîkayeyê vîndîkerde Mûsa Kolûmanî wend. Çalakî badê deqîqeyêke roniştişî qedîya.
Êlih
Merdimê Vîndîbîyayan û rayberê Şûbeyê Komeleya Heqanê Merdiman (ÎHD) ya Êlihî hewteyê 747. de çalakîya xo ya ‘Wa vîndîkerdeyî bêrê vînayene û faîlî bêrê muhakemekerdene’ verê Abîdeyê Heqanê Merdiman ê serê Cadeyê Gulîstanî viraşte. Çalakî de rayber û endamê ÎHD’yî û merdimê Vîndîbîyayan û xeylê kesî tewr bîyî û fotografê kesê ke destbendkerde ameyê kiştene û vîndîkerdene ameyê girewtene. Çalakîya nê hewteyî de faîlî temsîlkarê kovara Ozgur Halk yê Êlihî Çetin Ababay o ke temmuza serra 1992 de Êlih de amebî qetilkerdene pers kerd. Endamê ÎHD’yî Êlihî Sedat Yildirim hîkayeyê Çetin Abayay wend.
Eşkerayî badê deqîqeyêke roniştişî qedîya.
Colemêrg
Merdimê Vîndîbîyayan û Şûbeyê Komeleya Heqanê Merdiman (ÎHD) ya Colemêrgî, çalakîya xo ya bi nameyê ‘Wa vîndîkerdeyî bêrê vînayene faîlî bêrê muhakemekerdene’ ke hewteyê 228. de Kuçeyê Hunerî yê Geverî de viraşt. Çalakî de kesê ke destbendkerde ameyê vindîkerdene fotografê înan ameyê girewtene. Pawitoxê Heqanê Merdiman reyde endamê partîyanê sîyasî û temsîlkarê sazgehanê sîvîl tewrê çalakî bîyî.
Çalakîya nê hewteyî de aqûbeta 12 welatijanê Dewa Bêsusin ê girêdayê qezaya Rûbarok a Colemêrgî ke 24ê temmuze 1994 de hetê cendirmeyan ra amebî destbendkerdene û dima ra ameyî vîndîkerdene, ameyê persayene. Hemsereka Şubeyê ÎHD’yî ya Colemêrgî Sîbel Çapraz metnê eşkerayî wend û da zanayene ke heta aqûbeta heme vîndîbîyayan nêro zelalkerdene, ey do fek têkoşînê xo ra veranêdê.
