Çalakîyê Merdimê Vîndîbîyayan, ke her hewte yena virazîyayene, no hewte zî, Amed, Êlih, Riha, Colemêrg û Îzmîr de dewam kerd. Çalakîya Amedî de aqûbeta Osman Buluttekînî, çalakîya Êlihî de aqûbeta Mehmet Emîn Çelîkî, çalakîya Rihayî de aqûbeta Faysal Kizilirmakî û çalakîya Colemêrgî de aqûbeta Mehmet Ertakî ame persayene. Sewbîna Îzmîr de zî semedê 30ê tebaxî Roja Vîndîkerdena bi Zorî ya Mîyanneteweyî ra, eşkerayîye ame dayene.
Merdimê Vîndîbîyayan û Şûbeya Komeleya ÎHD’yî ya Amedî, çalakîya xo ya ‘Wa vîndîkerdeyî bêrê vînayene faîlî bêrê muhakemekerdene’ hewteyo 916. de, verê Abîdeyê Heqê Cuye yê Parka Koşuyolu ya Rezanê ya Amedî de, viraşte. Hemserekê ÎHD’yî yê Şûbeyê Amedî Ercan Yilmaz, pawitoxê heqê merdiman, endam û temsîlkarê sazîyanê sîvîl yê komelkî û merdimê vîndîbîyayan tewrê çalakîye bîyî. Çalakîye de fotografê kesê ke ameyê vîndîkerdene ameyê girewtene. ÎHD û merdimê vîndîbîyayan, çalakîya nê hewteyî de, aqûbeta Osman Buluttekînî, yo ke 23ê tebaxa 1995î de, qezaya Pasûrî ya Amedî de, kesanê ke xo sey polîsan dayê naskerdene ra bi zorî keyeyê xo ra ameyo vetene û berdene û a roje ra nat zî aqûbeta ey nêna zanayene, persa.
Hîkayeya Osman Buluttekînî hetê endama ÎHD’yî, avûkate Berfîn Elçî ra ame wendene.
Eşkerayî badê deqîqeyêke roniştişî qedîya.
Êlih
Merdimê Vîndîbîyayan û Şûbeyê Komeleya ÎHD’yî ya Êlihî zî, seba ke aqûbeta vîndîbîyayan bêro zelalkerdene û bi waştişê muhakemekerdena faîlan, hewteyo 752. de çalakîya xo verê Abîdeyê Heqê Merdiman ê Cadeya Gulîstane de, viraşte.
Çalakîye de aqûbeta Mehmet Emîn Çelîkî, yo ke 28ê tebaxa 1994î de, taxa Yenî ya girêdayîya qezaya Hezoyî ya Êlihî de, ame kiştene, ame persayene.
Hîkayeya Mehmet Emîn Çelîkî hetê rayber Huseyîn Elçî ra ame wendene.
Eşkerayîye de Huseyîn Elçîyî vat ke kesê ke fermanê înfazê Mehmet Emîn Çelîkî dayê, hema nêameyê muhakemekerdene û waşt ke kesê ke fermanê înfazî dayê bêrê muhakemekerdene.
Sewbîna Huseyîn Elçî dîyar kerd ke heta peynî seba caardena edaletî û vetişê heqîqetî do têkoşîn bikerê û gamî peyser nêerzê.
Eşkerayî badê deqîqeyêke roniştişî qedîya.
Riha
Şûbeya Komeleya ÎHD’yî ya Riha û merdimê vîndîbîyayan, hewteyo 82. de, çalakîya xo ya bi waştişê ‘Wa vîndîkerdeyî bêrê vînayene faîlî bêrê muhakemekerdene’ domna.
Merdimê vîndîbîyayan û avûkatê heqê merdiman, Parka Novadayê ya qezaya Xelîlîye ya Riha de kom bîyî.
Çalakîye de pankartêk ke fotografanê vîndîbîyayan ra ware yeno û fotografê vîndîkerdeyan ameyê girewtene.
ÎHD’yî çalakîya xo ya nê hewteyî de aqûbeta Faysal Kizilirmakî, yo ke serra 1992î de, wexta ke şono kar, netîceya hêrişêko çekdarî de cuya xo ra bîyo, ame persayene.
Endamê sazîyanê sîvîl û xeylî merdimê vîndîbîyayan tewrê çalakîye bîyî.
Hîkayeya vîndîkerdena Faysal Kizilirmakî hetê temsîlkarê Şûbeya ÎHD’yî ya Riha, Mehmet Kilinç ra ame wendene.
Eşkerayî badê deqîqeyêke roniştişî qedîya.
Colemêrg
Çalakîya Şûbeya Komeleya ÎHD’yî ya Colemêrgî û merdimê vîndîbîyayan a ‘‘Wa vîndîkerdeyî bêrê vînayene faîlî bêrê muhakemekerdene’ kuçeyê Hunerê ya Geverî de ame virazîyayene. Hewteyo 242. yê çalakîye de kiştoxê Mehmet Ertakî, yo ke 18ê tebaxa serra 1992î de Şirnexî de ameyo vîndîkerdene, ame persayene.
Metnê eşkerayîye hetê sekretera ÎHD’yî ya Colemêrgî Pinar Şenî ra ame wendene û ame dîyarkerdene ke no 34 serrî yo ke kiştoxanê Mehmet Ertakî nêameyê dînayene û nêameyê muhakemekerdene. Peynîya eşkerayîye de persa ‘Vîndî dîyar o, faîlî kotî yê?’ ame persayene.
Eşkerayî bi çalakîya roniştişî qedîya.
Îzmîr
Komîsyonê Vîndîbîyayan ê Şûbeya ÎHD’yî ya Îzmîrî, ke çalakîya nê hewteyî, ya ke her di hewteyan de rayêk verê Sumerbanka Kehan ya Konakî de virazena, semedê 30ê tebaxî Roja Vîndîkerdena bi Zorî ya Mîyanneteweyî ra, eşkerayîyêk da. Eşkerayîye de pankartê ‘Vîndî dîyar ê, faîlî kotî yê?’ û ‘Vîndî wijdanê to yê, wayîrê wijdanê xo vejîye’ ameyê akerdene. Eşkerayîye hetê Endama Komîsyonê Vîndîbîyayan ya ÎHD’yî Vetha Aydine ra ame wendene.
Vetha Aydine dîyar kerd ke hadîseyê vîndîkerdena bi zorî yê ke taybetî serranê 1990î de qewimîyayî, hema zî nêameyê roşnkerdene û polîtîkaya bêcezayîye dewam kena û vat: “Cigêrayîşê ma yê edaletî û heqîqetî, zaf şaristanan de, taybetî hetê Dayikan/Merdimanê Şemeyî ra verê Lîseya Galatasarayî de yena rayraberdene, bi qerarî dewam kena. Bê têrîameyîşê vîyarteyî rê û bêmuhakemekerdena berpirsîyaran, awankerdena aştîyêka komelkî ya domdare mumkin nîya; ganî dewlete dosyayanê vîndîbîyayan û gorê komî bi qeydeyanê zanistî cigêrayîş bikero.”
Vetha Aydinî dewleta Tirkîya rê vengdayîş kerd ke Peymana Neteweyanê Yewbîyayeyan a Vera Vîndîkerdena bi Zorî îmza bikera û vîndîkerdena bi zorî mîyanê krîteranê mîyanneteweyî de sey sucêko xoser bierjno û no çî vatê: “Ma heta ke aqûbetê heme vîndîbîyayan bêro eşkerakerdene, heqîqet bêro vetene, berpirsîyarî bêrê muhakemekerdene û bêcezayî biqedîyo, têkoşînê xo do domnenê.”
