Hemverfeka HDK’yî Meral Daniş Beştaş da zanayene ke nêzdîbîyayîşê vera Rayberê Şarê Kurdî Abdullah Ocalanî, nêzdîbîyayîşê vera prosesî yo û wina vat: “Ganî Birêz Abdullah Ocalan şert û mercanê azadan de bixebitîyo. Komel zî pawitişê qanûnan de yo. Ganî vera ke Meclîs şêro betlane, qanûnî bêrê viraştiş.”
Prosesê Aştî û Komelê Demokratîk ke Vakurê Kurdîstan û Tirkîya de dest pêkerdo, rojevo sereke yê sîyasetî yo. Komîsyonê Meclîsî ke çarçewaya nê prosesî de amebi awankerdene, dimayê nuştişê raporê hemparî xebatê xo qedênaybî. Labelê ser ra di aşmî vîyartî, hema zî qanûnê ke seba prosesî lazim ê nêyenê viraştiş. No zî mîyanê komelî de fîkranê xiraban û gumanan virazeno.
Heta ke komel pawitişê qanûnan de yo, Serekê Meclîsî Numan Kurtulmuş eşkerayîya xo de vatbi ke hetê sîyasî ra gamî ameyê eştiş û ê paweyê gamanê rêxistine yê. Labelê sîyasetê kurdî û demokratîk zî paweyê gamanê dewlete ya.
‘Gamî bi yew hetî nêyenê eştene’
Meral Daniş Beştaşe dîyar kerd ke seba averşîyayîşê prosesî sey sîyaseto demokratîk xebatê înan dewam kenê û vat: “Labelê her çî tena milê sîyasetê demokratîk de nîyo. Sermuzakerekerdoxo sereke yê prosesî Birêz Abdullah Ocalan o û muzakereyî ey de yenê kerdene. Derheqê çekveradayîş û viraştişê qanûnan de muzakereyî hetê Birêz Ocalan, rêxistine û dewlete ra yenê rayraberdene.”
Beştaş qiseykerdişê xo wina qedêna: “Ma vanê no proses bi yew hetî nêbeno. Ganî gamî mîyanê hemsencîyek de, pîya bêrê eştene. Her di hetî zî ganî hetê xo ra gaman bîerzê. Rêxistine 27ê sibate de vengdayîşiê aştî ser o xo fesih kerd û xo apey ant. Labelê medyaya îqtîdarî û muxalefetî hema zî vanê rêxistine çekan nêverdana. Labelê rêxistine tersê nê fîkran kerd.”
