Meclîsê Cinîyan ê DEM Partî eşkera kerd ke do têkoşînê hempar ê vera Pakêta Hukmî ya 12. gird bikerê û komelê demokratîkî bi qerardarî bipawê.
Meclîsê Cinîyan ê DEM Partî eşkerayîyêka nuştekî daye û vat ke Pakêta Hukmî ya12. serûberkerdişêkê huqûqî, gamê projeyê îqtîdarî ra ya ke wazena goreyê xeta xo ya îdeolojîke newe ra şekil bido komeli .
Mîyanê eşkerayî de nê îfadeyan ca girewt: “Demêk de ke feqîrî, bêkarî, qetlê cinîyan, îstîsmarê domanan, bêcezaverdayîş û bêadaletî xorîn benê, îqtîdar herinda ke nê problemanê struktûrelan çareser bikero, bi serûberkerdişanê ke heqê cinî, doman û LGBTÎ+yan hedef genê, cehd keno rojdemê komelkî bivurno.
Pakêta hukmî sey metodêkê newe ra dîzaynkerdişê komelî bi qodanê yewgir, cinsîyetgir û pederşahî yenê şuxulnayene. Hedefgirewtişê ‘nafaqaya feqîrîye’ ke heqê destkewte yê cinîyan o, mehkumkerdişê cinîye seba muhîtê şîdetî yo. Nafaqaya Feqîrîye mekanîzmayêka ke camêrdî nêkena mexdûr, la wazena neseypêyîya xorîne ya cinîyan bihewêna. Mojnayîşê nê heqî sey ‘qezencêko neheq’ dişmenîya cinîyan o. Hema bi hezaran cinîyê ke cîya benê zafane nafaqaya xo nêeşkenê bigîrê; ma do vera xespkerdişê nê heqî bêveng nêmanê.
Serûberkerdişê derheqê prosesanê pêkerdişê cinsîyetî ke verkar de yê, berhemê fehmêkê ke nasnameyê cinsî yê cîyayan keno înkar, hedef mojneno û amancê ci cezakerdiş o. No nêzdîbîyayîş sucê kînî teşwîq keno û heqê kesî yê vera bedenê xo xesp keno. Resayîşê xizmetanê weşîye heqêko bingeyin ê merdimîye yo û sînorkerdişê nê heqî bi sebebanê sîyasîyan îdeolojîk qebul nêbeno.
Ma do destûr nêdê ke heq û destkewteyê ma bibê babetê bazarî. Ma do bi qerardarî heqê cuye, heqê hemwelatîya hempare û azadîya cinî, doman û LGBTÎ+yan bipawê. Komelêko demokratîk, hempar, azad û pluralîst bi xespkerdişê heqan ney, tena bi hîrakerdişê heqan eşkeno bêro awankerdene. Coka ma do têkoşînê vera xespê heqan ke bi nameyê Pakêta Hukmî ya 12. yenê ferzkerdene, gird bikerê.”
