Fermandarê Pêroyî yê HSD’yî Mazlum Ebdîyî vat ke ê girêdayeyê peymana 29ê Çeleyî yê û babeta adirbest û gamanê entegrasyonî de bingeyê pawitişê taybetmendîyanê herêmanê kurdan ser o averşîyayîş bîyo. Ebdîyî vat ke hedefo esasî serkewtiş û xurtkerdişê aştîya domdar o.
Ebdî beşdarê kombîyayîşî bi ke bi sloganê, “Pîya seba pawitişê komelê xo, mil bi mil ver bi yewîye û aramîye. Aştîya sîvîle berpirsîyarîya ma ya hempar a, vatişê ma yew o û ewleyîya ma yew a. Fitney û ziwanê nefretî rê nê” bi pêşengîya Komîteya Rîsipîyanê Hesekê û Meclîsê Rîsipîyan ê Hesekê de ewro Salona Şeto ya şaristanê Hesekê de ame kerdene. Temsîlkarê eşîranê ereb û kurdan, roşnvîr û partîyê sîyasî beşdar bîyî.
Kombîyayîşî de Ebdîyî qisey kerd û vat ke înan peymana 29ê Çeleyî îmza kerd û ê prosesê caardişê aye de yê. Ebdîyî dîyar kerd ke rojanê peyênan de heme hetanê mîyanneteweyî reyde kombîyayîşê hîrayî kerdî û heme hetî wazenê ke peymane bêra caardene. Ebdîyî vat ke seba herême çîyo muhîm heme herêman de caardişê peymane yo. Herêmê sey Efrîn, Serêkanî, Kobanî û Hesekê.
Babetê leşkerî de Ebdîyî vat ke caardîş biney erey kewt. Ganî hêzan roja dîyine ya peymane de xo apey biantêne la nika hêzan bi serkewtiş cepheyanê şerî ra xo apey anto. La Kobanî de tayê problemî dewam kenê û muzakereyî seba hewanayîşê dorpêçî dewam kenê.
Ebdîyî vat ke peymane di hetê xo est ê; yew girêdayeyê kurdan o û yo bîn heme temsîlkaran xo de hewîneno. Ebdîyî vat ke heto tewr muhîm entegrasyonê sazgehan o û gamî yenê eştene ke no entegrasyon serkewte bibo.
Ebdîyî derheqê kombîyayîşê Munîhî de vat ke Wezîrê Karanê Teberî û Serekê Îstîxbaratê Hukmatê Demkî reyde heme problemî ameyî muzakerekerdene û pêkerdiş ame kerdene ke her di hetan ra komîteyê rayberîye bêrê ronayene ke prosesê entegrasyonî lezêr bikerê.
Ebdîyî bale ante vatişanê nîjadperest û mezhebperestser o ke vêşî bîyî û vat: “Seserrî yo ke kêmneteweyê herêma Cizîre pîya ciwîyenê. Zaf hetan cehd kerd ke fitne virazê la sernêkewtê. Seba ke welatijanê herême pêkerdo ke pîya biciwîyê. Pawitişê taybetmendîyanê herêmanê kurdan ser o pêameyîş bîyo û no yeno na mana ke welatijê herême heme hetan ra do herêmanê xo çarçeweya sazgehanê dewletî de îdare bikerê.”
Ebdîyî peynîya qiseykerdişê xo de vat: “Proseso nikayîn prosesêko newe yo. Ganî xeletîyanê verêna ra dersî bêrê girewtene. Ameyox muhîmêr o. Ganî ma vernîya xo ra biewnîyê û paştîya xo bidê planêko zelal. Pîştîdayîş rayîrê serkewtişê pêkerdişî yo, pawitişê aştîya domdar o û girewtişê vernîya fitneyan o.”
